पोलियो थोपा खुवाउन सुरू

भरतपुर । चितवनमा पाँच वर्षमुनिका ६७ हजार १८४ जना बालबालिकालाई पोलियो थोपा खुवाउने लक्ष्यअनुसार कार्यक्रम सुुरू भएको छ ।
पोलियो थोपा खुवाउने कामलाई व्यवस्थित गर्न जिल्ला जनस्वास्थ्य कार्यालयले प्रत्येक गाविसमा नौदेखि १५ वटासम्म र कुल ५३० केन्द्र तोकेर पोलियो थोपा खुवाउन सुुरू गरेको हो । शनिबार छुटेकालाई आज आइतबार घरघरमै पुगेर पोलियो थोपा खुवाइने छ । यसअघि पुसको ६ र ७ गते पनि यहाँ पोलियो थोपा खुवाउने अभियान सञ्चालन गरिएको थियो ।
बिहानदेखि सुरू गरिएको कार्यक्रमका लागि एक हजार ६० जना स्वयम्सेवक परिचालन गरिएको जनस्वास्थ्य कार्यालय चितवनका खोप सुपरीवेक्षक गंगाधर पण्डितले जानकारी दिनुभयो । पोलियो थोपा खानबाट बालबालिका नछुटून् भनेर एक साताअघिदेखि नै तयारी थालेको जनस्वास्थ्य कार्यालय चितवनले जनाएको छ ।
पोलियो रोगका दृष्टिले चितवन उच्च जोखिममा रहेको छ । भारतसँग सीमा जोडिएको र बसाइँसराइँ उच्च हुने गरेकाले चितवन पोलियो रोगको उच्च जोखिममा पर्दछ ।
नेपालमा सन् २०१० देखि पोलियोका रोगी देखा परेका छैनन् । पोलियो उन्मूलन गर्ने उद्देश्यले सरकारले देशैभरि यो अभियान जारी राखेको छ । जन्मेदेखि पाँच वर्षमुनिका सबै बालबालिकालाई पोलियो थोपा खुवाउने अभियानको उद्देश्य रहेको छ । कार्यक्रमअन्तर्गत नेपालमा पाँच वर्षमुनिका ४२ लाख २६ हजार ९९६ बालबालिकालाई पोलियो थोपा खुवाउने कार्यक्रम रहेको छ ।
चितवनमा एक वर्षमुनिका ११ हजार ५५ र एक वर्षदेखि पाँच वर्षसम्मका ५६ हजार १२९ बालबालिकालाई थोपा खुवाइने चितवनका जनस्वास्थ्य प्रमुख केहरसिंह गोदारले बताउनुभयो । उहाँका अनुसार चितवनको भरतपुरमा एक वर्षमुनिका दुई हजार ७८७ र एकदेखि पाँच वर्षका १५ हजार ३२३ बालबालिकालाई थोपा खुवाइने लक्ष्य छ ।
यस्तै रत्ननगर नगरपालिकामा एक वर्षमुनिका ८७० र एक वर्षदेखि पाँच वर्षसम्मका चार हजार २६६ जना बालबालिकालाई थोपा खुवाइने छ ।