गीतकार नन्दन सम्मानित

भरतपुर । शब्दबाटिका वीरेन्द्र बहुमुखी क्याम्पसले वरिष्ठ गीतकार प्रेमविनोद नन्दनलाई सम्मान गरेको छ । संस्थाको वार्षिकोत्सवको अवसरमा आयोजित स्रष्टा सम्मान तथा विशेष गजल वाचन कार्यक्रममा नन्दनलाई सम्मान गरिएको हो ।
कार्यक्रममा चितवनका पाँचवटा क्याम्पसका १४ जना विद्यार्थीहरुले आफ्ना तीन–तीन वटा गजल वाचन गरेका थिए । कार्यक्रममा वाचन भएका गजलमाथि रमेश प्रभातले टिप्पणी गरेका थिए । त्यस्तै कवि भूपिनले गलजमा कविताको चेत र बिम्बको बारेमा टिप्पणी गरेका थिए । संस्थाका अध्यक्ष नरेन्द्र पौडेलको अध्यक्षतामा कार्यक्रम भएको थियो भने कार्यक्रमको प्रमुख अतिथि साहित्यकार गोविन्दराज विनोदी थिए ।
यसैबीच शनिबार नै भएको अधिवेशनले बिजनबाबु खनालको अध्यक्षतामा नयाँ समिति चयन गरेको छ । समितिको उपाध्यक्षमा दामोदर सापकोटा दामु र सचिवमा सुनिल महतो चयन भएका छन् ।