भरतपुर । धार्मिक तथा ऐतिहासिकस्थल गणेशस्थानलाई नेपालकै सबैभन्दा ठूलो गणेशधामका रुपमा विकास गर्ने उद्देश्यले भोलि शनिबारदेखि सञ्चालन गर्न लागेको धनधान्याचल ज्ञानमहायज्ञ–२०७५ को सबै तयारी सकिएको आयोजकले जनाएको छ ।
महायज्ञ आयोजक मूल समारोह समितिले बिहीबार महायज्ञ स्थलमै पत्रकार सम्मेलन गरेर तयारीबारे जानकारी गराएको हो । मंसिर २९ गतेसम्म सञ्चालन हुने महायज्ञबाट करिब २० करोड रूपैयाँ आर्थिक संकलन गर्ने लक्ष्य लिइएको आयोजकले जनाएको छ । महायज्ञ सञ्चालन गर्नका लागि भने करिब ७० लाख रूपैयाँ खर्च लाग्ने अनुमान गरिएको गणेशस्थान मन्दिर संरक्षण तथा संवद्र्धन समितिका अध्यक्ष दिनेशकुमार चुकेले जानकारी दिए ।
गणेशस्थान क्षेत्रलाई धामका रुपमा विकास गर्न डीपीआर निर्माणको कामसमेत अन्तिम चरणमा पुगिसकेकोले महायज्ञ सञ्चालनबाट संकलित रकमले छिट्टै नै धाम निर्माण गरिने महायज्ञ मूल आयोजक समितिका महासचिव रवीन्द्र बरालले जानकारी दिए । करिब १४ लाखको लागतमा डीपीआर निर्माण भइरहेको उनको भनाइ छ ।
‘मंसिर महिनाभित्रै डीपीआरको काम सकेर फेजवाइज निर्माणको चरणमा जानेछौँ’, उनले भने, ‘महायज्ञबाट उठ्ने रकममाथि अन्य दाता, स्थानीय सरकार, प्रदेश सरकार र केन्द्रीय सरकारको सहयोगमा देशकै नमुना धामका रुपमा विकास गर्ने लक्ष्य लिएका छौँ ।’ डीपीआरअनुसारको काम सम्पन्न गर्न करिब ८० करोड खर्च लाग्ने अनुमान गरिएको उनले बताए ।
भरतपुर ११ स्थित गणेशस्थानमा रहेको ४४ बिगाहा जमिनमा गणेशधाम निर्माण गर्ने योजनासहित महायज्ञ सञ्चालन गर्न लागिएको हो । त्यसमध्ये २५ बिगाहा जग्गामा मात्रै तलाउ निर्माण गरिने लक्ष्य छ । डीपीआर अनुसार सो क्षेत्रमा विभिन्न मन्दिर, जल विनायक, शिव–पार्वतीको मूर्ति, सामुदायिक वन क्षेत्रमा तलाउ, पार्कलगायतका संरचनाहरु निर्माण हुनेछन् । धाम निर्माण गर्न ३ नं प्रदेश सरकारले यसअघि नै ८० लाख रूपैयाँ बजेट विनियोजन गरिसकेको समितिले जनाएको छ ।
सोही पत्रकार सम्मेलनमा बोल्दै प्रदेश सांसद् विजय सुवेदीले समग्र चितवन जिल्लाकै प्रतिष्ठासँग जोडिएकाले जतिसक्दो छिटो गणेशधाम निर्माण गरिसक्नुपर्ने बताए । मंसिर महिनालाई गणेशधाम निर्माणको पर्वका रुपमा मनाउने अभियान बनाइएको भन्दै गणेशधाम निर्माणका लागि सुरूवाती चरणदेखि नै निरन्तरता दिँदै आएको समेत दाबी गरे ।
महायज्ञको पूर्वसन्ध्यामा समितिका अध्यक्ष दिनेश चुकेको संयोजकत्वमा पाँच हजार १ सदस्यीय मूल आयोजक समिति गठन गरेर काम भैरहेको छ । एक हप्तासम्म सञ्चालन हुने धनधान्याचल ज्ञानमहायज्ञमा युवा वाचक पण्डित दीनबन्धु पोखरेलले प्रवचन दिनेछन् । महायज्ञको उद्घाटन भने प्रदेश नं ३ का मुख्यमन्त्री डोरमणि पौडेलले गर्ने समितिले जनाएको छ ।
