रत्ननगर । सहकारी र यसले सञ्चालन गर्ने कार्यक्रमका बारेमा सदस्यहरुलाई जानकारी दिने उद्देश्यले बुधबार रत्ननगरमा कार्यकुशलता तथा सिकाइ व्यवस्थापन प्रशिक्षण कार्यक्रम गरिएको छ ।
रत्ननगर १, बकुलहरमा रहेको अर्पण बचत तथा ऋण सहकारी संस्था लिमिटेडको आयोजना र नेपाल बचत तथा ऋण सहकारी संस्थाको प्राविधिक सहयोगमा कार्यशाला गोष्ठी गरिएको हो ।
प्रमुख अतिथि रत्ननगर नगर कार्यपालिकाका मेयर नारायण वनले नगरको आर्थिक विकासका लागि नगरपालिकाले सहकारीसँग सहकार्य गर्न चाहेको बताए । उनले छरिएर रहेका सहकारीहरु एकै ठाउँमा समायोजन गरी एकीकृतरुपमा आर्थिक विकासको काम गर्नुपर्ने बताए ।
१४ वटा सहकारीका सदस्यहरुकोे सहभागिता रहेको कार्यक्रममा सहकारीको उद्देश्य, सहकारीले प्रदान गर्ने सेवा र चुनौतीको समाधानका बारेमा सहजीकरण गरिएको थियो ।
संस्थाका अध्यक्ष यमन भुसालको अध्यक्षतामा भएको सो कार्यक्रममा नेफ्स्कुन नारायणी फिल्ड कार्यालय व्यवस्थापन उपसमितिका सदस्य भरत दवाडी, संस्थाका उपाध्यक्ष मेघनाथ पौडेल, अर्पण बचत तथा ऋण सहकारी संस्था लिमिटेडका लेखा संयोजक रामचन्द्र देवकोटालगायतले मन्तव्य राखेका थिए ।
