काठमाडौँ । नेपाली काँग्रेसका वरिष्ठ नेता शेरबहादुर देउवाले पार्टीभित्र अन्तिम समयसम्म आफू सहमतिको प्रयासमा रहेको र केही लागेन भने संसदीय दलको नेतामा उम्मेद्वारी दिने विचारमा रहेको बताउनुभएको छ ।
आज नयाँ बानेश्वरमा डाक्नुभएको नेपाली काँग्रेसका सभासद्को भेलामा नेता देउवाले आफूले पार्टीभित्र सहमतिको लागि अन्तिम प्रयास गर्ने र केही लागेन भने मात्रै निर्वाचन लड्ने सोच भएकाले सहयोग गर्न सभासद्हरुलाई आग्रह गर्नुभयो ।
“सहमति भनेको सम्झौता पनि हो, यसमा पार्टीको विधान बाधक बन्न सक्दैन”–नेता देउवाले भन्नुभयो । आफूले यही पद चाहिन्छ भनेर नभनेको तर पार्टीमा काम गर्दा भूमिका आवश्यक रहेको भन्दै नेता देउवाले संविधान बनाउन देशमा सबैको सहमति लिन आवश्यक छ र त्यसको लागि पार्टीभित्र सहमति र एकता जरुरत पर्दछ भन्नुभयो ।
काँग्रेस संसदीय दलको नेताको निर्वाचनको कार्यतालिका पार्टीले प्रकाशन गरिसकेको छ । दलको नेता चयनको लागि आइतबारको लागि निर्वाचनको समय तोकिएको छ । शनिबार उम्मेद्वारी मनोनयन दर्ता गर्ने समय तोकिएको छ ।
दलको नेता नै प्रधानमन्त्री हुने काँग्रेसको विधानमा लेखिएकाले दलको नेताको लागि पार्टी सभापति कोइराला, वरिष्ठ नेता देउवा र उपसभापति रामचन्द्र पौडेल तीनजना आकाङ्क्षी देखिनुभएको छ ।
उहाँहरुबीच यसअघि सहमतिको लागि पटकपटक प्रयास भएपनि अझै सहमति हुन नसकेपछि तीनै नेताले केही दिनयता पार्टीका सभासद्लाई बेग्लाबेग्लै भेला गरेर तथा समूह र एक्लै पनि भेटेर आफूलाई सहयोग गर्न आग्रह गर्दै आउनुभएको छ ।
पार्टी सभापति सुशील कोइरालाले यसपटक राष्ट्रिय, अन्तर्राष्ट्रिय परिस्थिति आफ्नो अनुकूल रहेकाले सहयोगका लागि आग्रह गर्नुभएको छ भने उपसभापति पौडेलले पनि अघिल्लो संविधानसभामा संसदीय दलमा खेलेको भूमिका तथा आफूले पार्टीमा दुःख गरेकाले सरकारको नेतृत्वको लागि चाहना राख्दै आउनुभएको छ । नेता देउवाले पनि पार्टीमा सरकारको नेतृत्व वा कार्यबाहक सभापतिको लागि चाहना राख्नुभएको बताइएको छ ।
आजको भेलामा वरिष्ठ नेता देउवाले संविधान संशोधन गरेर प्रधानन्यायाधीशलाई समेत मन्त्रिपरिषद्को अध्यक्ष बनाइएको दृष्टान्त दिँदै सहमतिको लागि पार्टी हितका लागि कुनै पनि कुरा बाधक नहुने र पार्टीको विधान पनि बाधक नहुने धारणा राख्नुभयो । “म पनि जुँगाको रेखी बसेदेखि नै लड्दै आएको, हो पञ्चायत व्यवस्था र राजा ज्ञानेन्द्रविरुद्ध लडेको हो, संयुक्त सरकार चलाएको तथा विगतमा पटकपटक प्रधानमन्त्री भएको अनुभव छ, मूल कुरा सहमतिको लागि नेतृत्वमा इच्छाशक्ति आवश्यक छ”– नेता देउवाले भन्नुभयो ।
यसैबीच, सभापति कोइराला, वरिष्ठ नेता देउवा र उपसभापति पौडेलबीच नेतृत्व चयनका लागि सहमति जुटाउन आज साँझ सभापति कोइराला निवास महाराजगञ्जमा छलफल भएको छ ।
पार्टीभित्र आन्तरिक शक्ति सन्तुलन कायम गरी सर्वसम्मत र एकतापूर्ण ढङ्गले नेता चयन गरेर संविधानसभामा जाँदा पार्टीको छवि र सन्देश राम्रो जाने भएकाले सहमति जुटाउन त्रय नेताबीच छलफल भएको बुझिएको छ । रासस
अनि यो पनि
प्रतिकृया
प्रतिकृया
