परीक्षाको मुखमा विद्यालय बन्द

भरतपुर । शैक्षिकसत्रको अन्त्य हुन लागेको छ । अब विद्यालयस्तरका अन्तिम परीक्षाहरु पनि नजिकिँदै छन् । यस्तो बेलामा शिक्षकहरु विद्यार्थीहरुलाई पढाउन ध्यान दिनुपर्ने हो उत्कृष्ट नतिजाका लागि, तर चितवनका शिक्षकहरु भने विद्यालय बन्द गराएर विद्यार्थीहरुको पढाइप्रति पटकपटक खेलवाड गर्दै आएका छन् ।
पटक–पटक विद्यालय बन्द गर्दै आइरहेको नेपाल संस्थागत विद्यालय शिक्षक युनियन नेपाल इस्टुले बिहीबारदेखि चितवनका निजी विद्यालयहरु बन्द गराएको छ । यसअघि पनि विभिन्न समयमा तीनपटक विद्यालय बन्द गराएको युनियनले बिहीबारदेखि फेरि जिल्लाका संस्थागत विद्यालयहरु बन्द गराएको हो । प्याव्सनसँग गरिएका पूर्वसहमति कार्यान्वयन नभएको भन्दै नेपाल (नेपाल इस्टु) चितवनले विद्यालय बन्द गरेको हो ।
जिल्ला शिक्षा कार्यालयको रोहवरमा प्याब्सनसँग भएको १८ प्रतिशत तलब वृद्धि र एक हजार महँगी भत्ता उपलब्ध गराउनुपर्ने सम्झौता लागू नभएको भन्दै नेपाल इस्टुले चितवनका निजी विद्यालयहरू अनिश्चितकालीन बन्दको घोषणा गर्नु परेको जनाएको छ ।
गत असोज ५ गते नेपाल इस्टु र प्याव्सन चितवनबीच ४ बुँदे सहमति भएको थियो । जसमा सरकारले आर्थिक वर्ष २०७०÷०७१ को बजेटमा सरकारी विद्यालयका शिक्षक तथा निजामती कर्मचारीहरुको १८ प्रतिशत तलब वृद्धि तथा एक हजार रूपैयाँ महँगी भत्ता दिने व्यवस्था बमोजिम तलब दिइने नयाँ तलब पौष मसान्तसम्म कार्यान्वयन गर्ने सहमति भएको थियो । उक्त सहमतिका कुनै पनि बुँदा कार्यान्वयन नभएको युनियनका चितवन अध्यक्ष विष्णुबहादुर भुजेलले बताए ।
माग पूरा नभएसम्म कुनै हालतमा बन्द फिर्ता नलिने उनले बताए । पटकपटक संस्थागत सहमति कार्यान्वयनको लागि प्याव्सनको मुख ताक्दा सहमति कार्यान्वयन नभएका कारण बन्दजस्तो आन्दोलनको बाटो अपनाउनु परेको उनले बताए ।
नेपाल इस्टु चितवनको बन्दका कारण चितवनका डेढ सयभन्दा बढी विद्यालयका सात हजार बढी विद्यार्थीको पठनपाठन प्रभावित भएको छ ।