चितवन आइडल अन्तिम चरणमा

भरतपुर । गायन प्रतिभाको खोजी गर्दै जेठ महिनाबाट सुरू भएको चितवन आइडल २०७० को उपाधिका लागि ६ प्रतिष्पर्धी अन्तिम चरणमा पुगेका छन् । चितवन चलचित्र कलाकार संघले गरेको गायन प्रतिभा खोजी अभियानमा ६३५ जना सहभागी रहेका थिए । नारायणगढमा गरिएको पत्रकार सम्मेलनमा चितवन आइडल २०७० का निर्देशक मिलन लामा गोलेले माघ २७ गते रत्ननगरमा चितवन आइडल उपाधिको औपचारिक कार्यक्रम गरिने जानकारी दिनुभयो ।
उहाँले चितवन आइडलको विजेताले नगद १ लाखसहित २ वटा चलचित्रमा गीत गाउन पाउने व्यवस्था मिलाइएको जानकारी दिनुभयो । चितवन आइडल सम्पन्न गर्न करिब २६ लाख खर्च लाग्ने अनुमान आयोजकले गरेको छ । चितवन कलाकार संघ रत्ननगरले आयोजना गरेको कार्यक्रमको सिम्रिक कला प्रशिक्षण केन्द्र रत्ननगर सहआयोजक संस्था हो । सिम्रिक कला प्रशिक्षण केन्द्रका कानुनी सल्लाहकार दिवाकर अर्यालले राष्ट्रिय कला संस्कृतिको सम्वद्र्धन तथा प्रवद्र्धन गर्न चितवन आइडलले कोशेढुङ्गाको भूमिका खेल्ने बताउनुभयो ।
रत्ननगरमा हुने सो उपाधि वितरण कार्यक्रममा गायककार रामकृष्ण ढकाल, नायिका सुमिना घिमिरे, नायक सौगात मल्ल, फिल्म निर्देशक बाबुराम ढकाल, हास्यकलाकार रवि डंगोल बेइमान, गायक कमल खत्रीलगायतले आआफ्नो प्रस्तुति समेत दिने छन् । युवाहरुको संगितप्रतिको आकर्षणलाई मध्यनजर गर्दै आगामी वर्ष पनि चितवन आइडल सिजन २ को कार्य जेठ महिनाबाटै सुरू गरिने चितवन चलचित्र संघले जनाएको छ ।
चितवन डान्स प्रतियोगिताको तयारीलाई पनि तीव्रता दिइएको आयोजकले जनाएको छ । पत्रकार सम्मेलनमा चितवन चलचित्र कलाकार संघ रत्ननगरका उपाध्यक्ष दीपक सिंह, सिम्रिक कला प्रशिक्षण केन्द्र रत्ननगरका अध्यक्ष दीपक अधिकारीलगायतको उपस्थिति रहेको थियो ।