गैँडाकोट ढोडेनीमा मावि आवश्यक

गैंडाकोट । गंैडाकोट–३ ढोडेनीकी ११ वर्षीया करिस्मा आलेमगर अहिले  त्यहाँको श्रीकृष्ण निमाविमा पढ्छिन् । नजिकै विद्यालय भएर अहिलेसम्म त सजिलो भएको छ उनलाई । कक्षा ८ मा पढ्ने उनीलाई जिल्लास्तरीय परीक्षा कसरी पास गर्नेभन्दा पनि पास भएपछि कुन स्कुल पढ्न जाने र कसरी जाने भन्ने चिन्ताले सताउन थालेको छ ।
‘अहिलेसम्म त नजिकै पढ्न पाइएको छ’, उनले भनिन्, ‘अब यहाँबाट पास भएपछि कहाँ जाने भन्ने समस्या छ, नजिकै स्कुल नै छैन ।’ कक्षा ८ सम्मको पढाइ नजिकै भए पनि त्यसभन्दा माथिको पढाइको लागि कि त गैँडाकोट आउनुपर्ने हुन्छ कि त कालिगण्डकी पारी तनहुँ जानुपर्ने हुन्छ ।
करिस्मा त प्रतिनिधि पात्रमात्र हुन् उनीजस्ता विद्यार्थीहरुले यही समस्याले पिरोलिरहेका छन् । सोही विद्यालयमा पढ्ने सन्तोष थापामगरलाई सकेसम्म त उच्च शिक्षा नै पढ्न मन छ, तर उनको व्यथा पनि उस्तै छ । ‘आर्थिक अवस्था पनि कमजोर छ’, उनले भने, ‘नजिकै विद्यालय छैन्, टाढा बसेर पढ्न सम्भव देखिँदैन । यहाँ मावि अति आवश्यक छ ।’
नवलपरासी जिल्लाको सुगम गाविस हुनुका साथै मध्य नेपालको व्यापारिक केन्द्रको नजिकै रहेको गैँडाकोटको ढोडेनीको यो समस्यालाई समाधान गर्नेतर्फ भने कसैले चासो नदिएको यहाँका स्थानीयहरु गुनासो गर्छन् । सोही गाविसका राजमार्ग छेउका बालबालिकाहरु टाइ र जुत्तासहित सुकिला कपडामा टिफिन लिएर स्कुल बसमा विद्यालय पढ्न जाँदा ढोडेनीका यी बालबालिकाले आफ्नै घरको आँटो खाएर विद्यालय जान्छौँ व्यवस्था मिलाई दिनूस् भन्दा पनि कसैले सुनुवाइ नगरेको स्थानीय बद्रिप्रसाद रिमाल बताउँछन् ।
‘आठ कक्षापछि नौ कक्षा पढ्न जान हाम्रा बालबालिकालाई मुस्किल  छ’, उनले भने, ‘गाउँमा नै आठ कक्षाभन्दा माथिको कक्षा नहुँदा र तल बजारमा झरेर पढ्नका लागि घरको स्थिति नमिल्ने भएकाले धेरैले त बीचैमा पढाइ छोड्न समेत बाध्य छन् ।’ रिमालसँग आफ्नो पढाइलाई यही समस्याले निरन्तरता दिन नपाएको तीतो अनुभवसमेत छ ।
अहिले पनि विद्यालयको वार्षिक तथ्याङ्क हेर्ने हो भने हरेक वर्ष ४० भन्दा माथि विद्यार्थीहरु ८ कक्षा पास गरेका छन् । कोही आफन्तकहाँ बसेर पूर्व–पश्चिम राजमार्गनजिकै रहेको जनक र कालिका स्कुलमा पढ्न आउँछन भने कोही डेढ घण्टाको पैदल हिँडेर तनहुँको कोठामा रहेको विद्यालयसम्म पुग्छन कति त त्यही बाख्रा चराएर हिँड्छन ।
विद्यालयका प्रधानाध्यापक सूर्यनाथ तिवारी विद्यालयमा माध्यमिक तहको कक्षा सञ्चालनको लागि प्रयास भएको बताउँछन् ।