सकियो रत्ननगर महोत्स्वः टिकौलीमा रंगशाला बनाउने प्रतिबद्धता

रत्ननगर । नेपाल सरकार तथा मन्त्रिपरिषद कार्यालयका सचिव कृष्णहरि बास्कोटाले टिकौलीमा क्षेत्रीयस्तरका रंगशाला निर्माणको लागि सरकार प्रतिबद्ध रहेको बताउनुभएको छ ।
आइतबार रत्ननगर महोत्सवको समापन कार्यक्रमलाई सम्बोधन गर्दै उहाँले आफू अर्थसचिव हुँदा प्रस्ताव गरिएको अन्तर्राष्ट्रिय स्तरका क्षेत्रीय रंगशाला बनाउन प्रक्रिया सुरू गर्ने बताउनुभयो । रंगशाला निर्माणको प्रक्रिया चलिरहेकै बेला वन्यजन्तु र जैविक विविधतालाई असर गर्ने भन्दै वन मन्त्रालयले टिकौलीमा रंगशाला निर्माणको काम रोकेको थियो ।
‘के कारणले काम रोकिएको हो’ उहाँले भन्नुभयो, ‘त्यसको अध्ययन गरी रंगशाला निर्माणको प्रक्रिया अगाडि बढ्नेछ ।’ उहाँले रंगशाला निर्माणको काम अनिश्चित बनेर अन्योलमा परेका जिल्लावासीलाई रंगशाला निर्माण हुनेमा ढुक्क हुन आग्रह गर्नुभयो ।
सचिव बास्कोटाले मुग्लिन–नारायणगढ सडक खण्डको पुनर्निर्माण, नारायणगढ–लोथर सडक खण्ड चौडा र मलेखु–भण्डारा चेपाङ मार्ग छिट्टै सम्पन्न गर्ने गरी सरकारले काम गरिरहेको बताउनुभयो । उहाँले रसुवागढी–त्रिसुली–गल्छी हुँदै ठोरीसम्मको प्रस्तावित राजमार्गमा लगानी गरी भारत र चीन जोड्ने छुट्टै दूरीको राजमार्ग तयार गर्न जरूरी रहेको बताउनुभयो ।
उहाँले चितवनलाई मेडिकल हवका रूपमा विकास गर्न आवश्यक पर्ने पूर्वाधार निर्माण र सुविधा विस्तार गरिने जानकारी दिनुभयो । सचिव बास्कोटाले चितवनमा सम्भावना बोकेका कृषि, पर्यटनको विकासको लागि सरकारी स्तरबाट गर्नुपर्ने सबै काम गर्न तयार रहेको उल्लेख गर्नुभयो । उहाँले पाँच वर्षभित्र नेपाललाई फलफूल, तरकारी, माछा, दूधमा आत्मनिर्भर बनाउने सरकारी योजना रहेको बताउनुभयो ।
पोल्ट्रीको राजधानीको रुपमा विकास भइरहेको सरकारले चितवनलाई पोल्ट्री किङ र पोल्ट्री क्यापिटल घोषणा गर्ने बताउनुभयो । सचिव बास्कोटाले काठमाडौंको जनसंख्यालाई मध्यनजर गरी चितवनमा उद्योगको स्थापना, एलपी ग्यासको बोटलिङ प्लान्ट, जिवित जनावर काठमाडौँ ढुवानी नगर्ने गरी स्टलर हाउस निर्माण गर्न जरूरी रहेको बताउनुभयो । सचिव बास्कोटाले अर्थतन्त्रको विकासको लागि सरकारले निर्देशिका बनाएर काम गरिरहेको बताउनुभयो ।
उहाँले स्वदेशी उत्पादनको खपत वृद्धि गर्न छुट्टै निर्देशिका जारी गरी प्रत्येक सरकारी कार्यालयले कम्तीमा ५० प्रतिशत स्वदेशी उत्पादन उपयोग गर्न निर्देशन दिइएको बताउनुभयो । निकासी प्रबद्र्धनका लागि सरकारले १ र २ प्रतिशत नगद अनुदानको व्यवस्था मिलाएको भन्दै उहाँले निकासी शुल्कमा ५० प्रतिशत छुट दिइएको बताउनुभयो । सचिव बास्कोटाले नेपालमा लगानीमैत्री वातावरण सृजना गर्न औद्योगिक व्यवसाय ऐन ल्याइने बताउनुभयो ।
चालु आवको पहिलो ५ महिनामा १० अर्बको बाह्य लगानी भित्रिएको भन्दै उहाँले सो अवधिमा करिव ५० अर्बको वैदेशिक सहायताको प्रतिबद्धता प्राप्त भएको बताउनुभयो । कार्यक्रममा रत्ननगर महोत्सव मूल समारोह समितिका संयोजक दीपककुमार कर्माचार्यले चितवनको कृषि, पर्यटन, शिक्षा र स्वास्थ्यको विकासको लागि काम गरिदिन सचिव बास्कोटालाई आग्रह गर्नुभएको थियो । उहाँले टिकौलीमा रंगशाला निर्माणको काम तत्काल सुरू गर्न संयोजक कर्माचार्यले सचिव बास्कोटालाई आग्रहसमेत गर्नुभयो ।