मौरीपालनमा आकर्षण बढ्यो

गैंडाकोट । गाईपालन, बाख्रा पालन, पोल्ट्रीजस्ता कृषि व्यवसाय सञ्चालन गर्दै आएका गैंडाकोटका कृषकहरु यतिबेला मौरीपालन व्यवसायमा आकर्षित भएका छन् । जनशक्ति, लागत र जग्गा कम भए पनि बढी मुनाफा आर्जन गर्न सकिने भएकोले यो व्यवसायप्रति कृषकको आकर्षण बढेको हो ।
मौरीपालन महासंघका अध्यक्ष राजेन्द्र गौतम मौसमअनुसार मह उत्पादन गर्न सकिने र सो व्यवसायबाट वातावरण तथा समाजमा नकारात्मक प्रभाव नपर्ने भएकाले मौरीपालन व्यवसाय फस्टाउँदै गएको बताउँछन् । गैंडाकोट–८ स्थित सागर मौरी पालन व्यवसाय सञ्चालन गर्दै आएका गौतमकोे फर्मबाट वार्षिक १५ मेट्रिक टन मह उत्पादन हुने गरेको छ । सो फर्ममा ३०० घार मौरी छन् । नौ जनाले प्रत्यक्ष रोजगारी पनि पाएका छन् ।
विगतमा चिया तथा किराना व्यवसाय गर्दै आएका छविलाल रिजाल पनि मौरी पालनमा आकर्षित भएका छन् । ५० घार मौरी पालेका उनले वार्षिक १५ क्विन्टल मह उत्पादन गर्दै आएका छन् । मौरी पालनले जीवनमा ल्याएको परिवर्तनले यस व्यवसायको भविष्य उज्ज्वल रहेको रिजालको भनाइ छ ।
मौरी पालन महासंघका अनुसार हाल नेपालमा १८ सय मेट्रिक टन मह उत्पादन हुने गर्छ । नेपालमा प्रतिव्यक्ति औषत ५० ग्राम मह उपभोग हुने गरेको उसको भनाइ छ । महको माग बढ्दो भएकाले हालको उत्पादनलाई वृद्वि गरी दसहजार मेट्रिक टन उत्पादन गर्ने लक्ष्य सरकारको छ ।
नेपालमा मौरी पालन व्यवसायतर्फ कृषकहरुको आकर्षण बढिरहेको छ । सरोकारवालाहरुले मौरी पालनसम्बन्धी आवश्यक नीति नियम बनाएर यो व्यवसायलाई व्यवसायीकरणका लागि प्रत्यक्ष अनुदान दिने व्यवस्था गरिनुपर्ने धारणा अध्यक्ष गौतमको छ । सरकारले अनुदानसहित मौरी पालनतर्फ किसानहरुलाई आकर्षित गर्न सके देशको अर्थतन्त्रमा यसले प्रभावकारी भूमिका खेल्न सक्ने देखिएको छ ।