जैविक अंगारसम्बन्धी तालिम

अमरापुरी । संयुक्त राष्ट्र संस्था नेपालको आयोजनामा तीन दिने जैविक अंगारसम्बन्धी तालिमको समापन भएको छ । सुन्दरी सामुदायिक वन उपभोक्ता समूह अमरापुरीको सभा हलमा भएको कार्यक्रममा सोही समूहका अध्यक्ष ठाकुरप्रसाद पाण्डेले अध्यक्षता गर्नुभएको थियो । कार्यक्रममा खेर गएका काठ वनमारा, पातपतिङ्गरहरुबाट जैविक अंगार उत्पादन गराएर तालिम सञ्चालन गरिएको थियो ।
तालिममा संयुक्त राष्ट्र संस्था नेपालका कार्यक्रम संयोजक संजयवीर थापा, प्रबन्धक मनमोहन भट्ट, विजयदेव भट्ट, कमल भण्डारी प्रशिक्षक रहनुभएको थियो । ७ वटा सामुदायिक वनका २ दर्जन व्यक्तिहरुको उपस्थिति रहेको थियो । यो विधि नवलपरासीमा नेपालकै दोस्रो पटक गर्न थालिएको हो ।
सामुदायिक वनका अध्यक्ष, उपाध्यक्ष, सदस्यलगायत तालिममा उपस्थित सबैलाई  प्रयोगात्मक विधिबाट अंगार उत्पादन गर्न फिल्डमा प्रत्यक्ष रूपमा सिकाइएको थियो । जैविक अंगारमा बोटबिरूवालाई चाहिने धेरै खाद्य तत्वहरु पाइने हुँदा यसलाई प्रश्रय दिइएको जानकारी प्रशिक्षक विजयदेव भट्टले बताउनुभयो ।
वैज्ञानिकका अनुसार बायोचारको प्रयोगले धेरैमा ३०० प्रतिशतसम्म माटोको उत्पादनशीलता बढ्न सक्छ भने पोषक त¤वको चुहावटमा कमी आइ रासायनिक मलको प्रयोगसमेत घट्न सक्ने देखिएको छ । हाल वैज्ञानिकहरु माटोमा अंगार हालेर खेती गर्दा खेती र वातावरण दुवै राम्रो हुने सम्भावना देखेर यसको अध्ययन तथा विश्लेषणमा जुटेका छन् । यसको अध्ययन  सर्वप्रथम ब्राजिलमा भएको पाइन्छ । चुलोको दाउरा सबै डढेर खरानी नभई केही हिस्सा अंगार हुने गर्दछ । अंगारको बनौट कोइलाजस्तै भएपनि यसको भित्री बनोट रासायनिक गुणमा फरक पाइन्छ । कमला अधिकारी, अमरापुरी