वृद्धा र विद्यार्थीलाई सहयोग

देवघाट । काठमाडौंको सुरूवात नेपाल नामक संस्थाले शुक्रबार देवघाटधामका वृद्धाहरु र विद्यार्थीलाई सहयोग गरेको छ । वृद्धाहरुलाई कम्बल र ग्यास सिलिण्डर तथा चुलो सहयोग गरेको हो । त्यस्तै विद्यार्थीलाई झोला, कापी र कलम सहयोग गरेको संस्थाका अध्यक्ष मथुरा ज्ञवालीको भनाइ छ ।
देवघाटधाममा रहेको हरिहर सन्यास आश्रमका प्रमुख ज्ञानानन्द स्वामीको प्रमुख आतिथ्यमा भएको कार्यक्रममा सहयोग सामग्री वितरण गरिएको थियो । सामाग्रीका लागि काठमाडौं नक्सालको सत्य साई केन्द्रले ५० हजार रूपैयाँ नगद सहयोग गरेको छ । केन्द्रसहित अन्य व्यक्तिहरुबाट पनि सहयोग जुटाएर सामग्री किनेको साई केन्द्रका सल्लाहकार माधव ज्ञवालीले बताए ।
वृद्धा अवस्थामा  देवघाटमा कल्पवास बस्न आएका अशक्तहरु छनौट गरेर सहयोग वितरण गरेको संस्थाका अध्यक्ष मथुरा ज्ञवालीले जानकारी दिइन् । सुरुवात नेपालले १० जना वृद्धाहरुलाई ग्याँस सिलिण्डर, चुल्हो र रेगुलेटरको सेट नै दिएको छ । त्यस्तै यसअघि ग्यास चुलो राखेका १५ जनालाई एक महिना ग्यास किन्ने पैसा सहयोग गरेको छ ।
त्यस्तै १५ जना वृद्धाहरुले न्यानो कम्बल पाएका छन् । ‘नमरूनजेल देवघाट बस्न भनेर आएका अर्थात् कल्पवासमा बस्ने वृद्धा आमाहरु अशक्त हुँदाहुँदै पनि सहयोग गर्नेहरुको ध्यान उनीहरुमाथि पुगेको थिएन । हामीले त्यस्तालाई छनौट गरेका हौं’ संस्थाका अध्यक्ष ज्ञवालीको भनाइ छ ।
संस्थाले देवघाटमा रहेको बज्रयोगिनी प्रस्तावित माध्यमिक विद्यालयका विद्यार्थीलाई झोला र कापी कलम सहयोग गरेको हो । सो विद्यालयका ३५ जना विद्यार्थीले सहयोग सामाग्री पाएका छन् । देवघाटको यो कार्यक्रमबाट संस्थाले आफ्नो औपचारिक गतिविधि सुरुवात गरेको अध्यक्ष ज्ञवालीको भनाइ छ ।