उपचारमा लापरबाही रोक

चिकित्सकको लापरबाहीका कारण सर्वसाधारणलाई उपचार गर्न त्रास उत्पन्न हुने गरेको छ । चिकित्सकका लापरबाहीले गर्दा सामान्य बिरामीको अनाहकमा ज्यान जाने गरेको छ । शल्यक्रियाजस्तो संवेदनशील विषयमा हेलचेक्र्याइँ गर्दा सामान्य बिरामीको अवस्था जटिल बन्ने गरेको छ । चिकित्सा क्षेत्रमा दिनहुँजसो लापरबाहीका घटना हुने गरे पनि कतिपय घटना बाहिर नआउँदा चिकित्सकहरुको मनोमानी बढ्दै गएकोे छ । उनीहरु संवेदनशील हुन सकेका छैनन् भने लापरबाही पनि घट्न सकेका छैनन् । चिकित्सा पेसा चुनौतीको हो । कहिलेकाहीँ होसियारी अपनाउँदा पनि अपवादमा कुनै घटनाहरु घट्नु सामान्य मानिन्छ । उपचारका क्रममा बिरामीलाई बचाउने प्रयास गर्दागर्दै मृत्यु हुने गरेका घटनालाई पनि सामान्य रुपमा नै लिनुपर्ने हुन्छ । चिकित्सकहरु आफैँमा भगवान् होइनन्, तर उनीहरुले जटिल अवस्थाका तथा आश मारेका बिरामीलाई समेत बचाएर भगवानतुल्य मानिएका पनि छन् । त्यसैले, चिकित्सकहरुमा पेसागत इमानदारिता र संवेदनशीलता हुनैपर्छ ।
नेपालमा मृत्युको मुखमा रहेका बिरामीलाई पुनर्जीवन दिएर चिकित्सकहरु लोकप्रिय बनेका पनि छन् । कति चिकित्सकहरुले बिरामीलाई छोइदिएर मात्र आधा रोग ठीक भएका उदाहरण पनि छन् । तर, बीपी कोइराला स्वास्थ्य विज्ञान प्रतिष्ठान धरानका चिकित्सकहरुले एक किशोरीको पाठेघरको शल्यक्रिया गर्दा मिर्गौलासमेत झिकिदिएको खबर सञ्चारमाध्यममा आएको छ । तर, बिरामीका आफन्तले भने ६ दिनपछि मात्र पाठेघरको शल्यक्रिया गर्ने क्रममा मिर्गौलासमेत झिकिएको थाहा पाए । अहिले ती किशोरीका परिवारका सदस्यले चिकित्सकले लापरबाही गरी मृर्गौला झिकेको भन्दै दोषीमाथि कारबाही र पीडितलाई क्षतिपूर्तिको मागसहित प्रहरीमा निवेदन दिएका छन् । यति ठूलो लापरबाही देखिँदा पनि प्रतिष्ठान व्यवस्थापन मौन देखिनुले यो घटना रहस्यपूर्ण बनिरहेको छ ।
चिकित्सकको यस्ता लापरबाही यसअघि पनि मिडियामा आइरहेका छन् । चितवनको एक अस्पतालमा चिकित्सकले घाँटीको शल्यक्रिया गर्नुपर्ने बिरामीको पाठेघर निकालिदिएको घटनाले त्यसबेला सर्वसाधारणमा आतंक मच्चाएको थियो । उपचारमा लापरबाही भएर बिरामीको मृत्यु भएको भन्दै सर्वसाधारण आक्रोशित हुँदै आएका घटना दर्जनौँ छन् । सर्वसाधारणलाई परेको मर्का तथा लापरबाहीका घटनाहरु कतिपय त्यत्तिकै सेलाइरहेका छन् । चिकित्सकहरुबाट हुने गरेका लापरबाहीबारे सर्वसाधारणमा कमै जानकारी हुने कारण यस्ता घटनाहरुको पुनरावृत्ति भइरहेको छ । तर, चिकित्सा पेसा मर्यादितभन्दा बढी लापरबाही र सर्वसाधारणको नजरमा अविश्वासिलो बन्दै गइरहेको पाइएको छ । उपचारमा त्रुटि नै नहुने भन्ने होइन, तर चिकित्सकको एउटा सानो गल्तीले बिरामीको ज्यानै जान पनि सक्छ । एउटा लापरबाहीले शारीरिक अवस्थामा जटिलता ल्याउन सक्छ । यस्ता घटनाबाट पाठ सिकेर चिकित्सकहरु आफैँमा जिम्मेवार बन्नु जरूरी छ ।