आयआर्जनमा संगठित हुँदै सुनौलो महिला समूह

होमनाथ सापकोटा
रत्ननगर । आयआर्जन र जीवन पद्धतिलाई सहज बनाउन रत्ननगर–९ सालघारीका महिलाहरु संगठित भएका छन् । आम्दानीको राम्रो स्रोत नभएर जीवन गुजारा गर्न कठिन हुँदै आएका तथा सम्पन्न भएर पनि समाजका केही गरेर देखाउनुपर्छ भन्ने मानसिकता बोकेका यस क्षेत्रका महिलाहरु समूहमा आबद्ध भएर सिर्जनशील काम गर्दै आएका छन् ।
सालघारीका महिलाहरुले सुनौलो महिला समूह गठन गरी आर्थिक रुपले सम्पन्न तथा कमजोर दुवै प्रकारका महिलाहरु आयआर्जनको कार्यक्रम सञ्चालन गरिरहेको छ । २०६७ सालमा स्थापना गरिएको सो समूहमा अहिले २८ जना महिलाहरु आबद्ध छन् । मासिक रुपमा १०० रुपैयाँ जम्मा गर्दै आएका महिलाहरु बाख्रा, कुखुरापालन, विरामी पर्दा सय कडा एक रुपैयाँ व्याजमा ऋण लगानीसमेत गर्दै आएका छन् । हामी समूहमा आबद्ध भएर महिलालाई पर्ने सबै प्रकारका समस्यामा सहयोग गर्ने गरेका छौं ।
समूहकी अध्यक्ष सरस्वती कोइरालाले भन्नुभयो, आयआर्जनको लागि सहयोग गरेर महिलाको जीवन पद्धति सहज बनाउने समूहको अर्को उद्देश्य पनि हो । समूहलाई आर्थिक रुपमा मजुबुत बनाउन महिलाहरु संगठित भएर आन्दानी हुने खालका अन्य कामहरु पनि गर्दै आएका छन् । रत्ननगर महोत्सवमा अवलोकनका क्रममा सुनोलो महिला समूहका महिला दिदीबहिनीहरु महोत्सवको एउटा स्टलमा खाजा बेचिरहेको भेटिए ।
महोत्सवमा सञ्चालन गरेको खाजा पसलबाट भएको आम्दानी समूहमा राखेर सिर्जनशील काममा लगाउने उनीहरुको उद्देश्य रहेको छ । उनीहरुले २०६८ सालमा पनि महोत्सवमा खाजा पसल सञ्चालन गरेका थिए । महोत्सवको हरेक दिन महिलाहरुले ग्राहकले रुचाउने परिकार बनाएर खुवाउने गरेका छन् । समूहमा आबद्ध १८ जनामध्ये घरको अनुकुलतालाई हेरेर खाजा पसलमा महिलाहरु पालैपालो आउने गरेको अध्यक्ष कोइरालाले बताउनुभयो ।
२०६८ सालको महोत्सवमा ३० हजार आन्दानी गरेका महिलाहरुले यसपटकको महोत्सवमा त्यो भन्दा बढी आम्दानी गर्ने लक्ष्य लिएका छन् । पहिलाको भन्दा दोब्बर आन्दानी गर्ने योजना छ अध्यक्ष कोइरालाले भन्नुभयो, स्वादिलो परिकार बनाएर ग्राहक तान्ने गरेका छौँ । खाजा पसलमा पकौडा, सेलरोटी, चप, चिया, मकै बेचेरै दैनिक ६ हजार आन्दानी गर्ने गरेको उहाँले बताउनुभयो । समूहमार्फत आयआर्जनका काम गर्दै आएका महिलाहरुकै पहलमा गाउँका अन्य १८ वटा समूह मिलेर सहकारी पसलसमेत सञ्चालन गरेका छन् ।
समूहमा बल हुन्छ, समूहले गरेका कामबाट गाउँका अरुले पनि फाइदा लिन सक्छन् भन्ने मान्यातालाई आत्मसाथ गरी सरकारी पसल सञ्चालन गरिएको हो, अध्यक्ष कोइरालाले भन्नुभयो, त्यसबाट पनि गाउँलेले आवश्यक सुविधा लिएका छन् । कृषि क्षेत्रलाई प्राथमिकता दिइएको रत्ननगर महोत्सवमा माछा र केराका छुट्टाछुट्टै रेष्टुरेण्ट पनि रहेका छन् ।