नियम मिच्ने तीन भारतीय ट्रक नियन्त्रणमा

भरतपुर । सवारी साधनको तौल क्षमताभन्दा बढी ढुवानी गरेको भन्दै तीन भारतीय ट्रक प्रहरी फन्दामा परेका छन् । सडक ऐनविपरित सडकको भार क्षमताभन्दा बढी तौलको भार बोकेर आएका भारतीय ट्रकलाई नेपालका यातायात व्यवसायीहरुले नियन्त्रणमा लिएर जिल्ला ट्राफिक प्रहरी कार्यालय चितवनलाई बुझाएका हुन् ।
यहाँका व्यवसायीहरुले मंगलबार चितवनको रामनगरबाट भारतीय ट्रकलाई नियन्त्रणमा लिएर ट्राफिकलाई बुझाएको जिल्ला ट्राफिक प्रहरी कार्यालयका प्रमुख प्रहरी निरीक्षक रविन श्रेष्ठले जानकारी दिए ।
नेपाल भारत सीमा नाका सुनौली भन्सार हुँदै काठमाडौँका लागि आएको भारतीय नम्बर प्लेटका ट्रकलाई नियन्त्रणमा लिइएको हो । नेपाल ट्रक यातायात व्यवसायी संघका सल्लाहकार अशोक पोखरेलका अनुसार सडक कानुन तोड्दै नेपाल प्रवेश गरेका यूपी १७ टी ४६६३, यूपी प ५३ सि.टी १८५१ र यूपी १२ टि ४५२३ नम्बरका ट्रक रामनगरमा व्यवसायीले पक्रेका हुन् ।
‘उनीहरुले सडक कानुन त तोडे, नेपालीहरुको रोजगारी पनि खोस्ने काम गरेका छन्’, पोखरेलले भने, ‘यो नै नेपाली व्यवसायीले पाउने कामको अवसर पनि भारतीय ट्रकले खोसेका छन् ।’
यसरी भारतबाट नेपाल भित्रिने सबैजसो मालबाहक ट्रकले सडक भारबहन क्षमता भन्दाबढी भार बोक्ने गरेका छन् । नेपालमा १२ चक्के ट्रकहरुले २० टन ६ सय क्विन्टलसम्म भार बोक्न पाउने कानुनमा रहे पनि ३० टनभन्दा बढी चामल बोकेको पाइएकाले नियन्त्रणमा लिइएको उनले बताए ।
संघले स्थानीय र बाह्य रुटका ट्रक निगरानीका लागि रामनगरमा राखेको युनिटको टोलीले शंका लागेपछि ट्रक रोकेको थियो । बढी भार भएको पाइएपछि ट्रक ट्राफिक प्रहरीलाई बुझाएको व्यवसायीको टोलीले जनाएको छ । ट्राफिक नियम अनुसार भार बढी भएको पाइए जरिवाना गरी कारबाही गरिने जिल्ला ट्राफिक प्रहरी चितवनले जनाएको छ ।