लागूऔषध ओसारपसारको ‘निकासी विन्दु’ चितवन

भरतपुर । पछिल्लो समयमा चितवन लागूपदार्थ ओसारपसारको मुख्य विन्दु बन्दै गएको पाइएको छ । लागूपदार्थविरुद्ध विगत केही महिनादेखि सुरू गरेको प्रहरी कारबाहीमा यस्तो पाइएको चितवन प्रहरीले जनाएको छ ।
पछिल्लो तीन महिनाको अन्तरालमा प्रहरीले पक्राउ गरेका २२ जना लागूऔषध ओसारपसारका कारोबारीबाट यस्तो रहस्य खुलेको चितवनका प्रहरी प्रमुख प्रद्युम्न कार्कीले जानकारी दिनुभयो । उनीहरूले शरीरका विभिन्न अङ्गमा टेप लगाएर, गाडीका सिटमुनि, सुटकेसमा हालेर लागूऔषध चितवन ल्याउने गरेका छन् । चितवनमा मोलमोलाई सकेपछि मात्रै अन्यत्र लैजाने गरेको अनुसन्धानमा संलग्न प्रहरी अधिकारीहरूले बताएका छन् ।
उहाँका अनुसार विशेषगरी भारतको रक्सौल नाका हुँदै चितवन ल्याएर कारोबारीहरूले चितवनमा लागूपदार्थ राख्ने र त्यसलाई राजधानीलगायत विभिन्न क्षेत्र पु¥याउने गरेका छन् । प्रहरीले पछिल्ला दिनहरूमा ३३२ एम्पुल डाइजोपाम, व्युप्रिनोर्फिन ३२७ एम्पुल, फेनारगन ३२८ एम्पुल, फेन्सिडिल पाँच हजार एमएल, नाइटोजेपाम १०८ ट्याबलेट, खैरो हेरोइनसमेत ठूलो मात्रामा बरामद गरिएको जनाएको छ । साथै, १५० भन्दा बढी लागूऔषध प्रयोगकर्तालाई पक्राउ गरिएको छ ।
प्रहरीले १० हजार ५०० लिटर घरेलु मदिरा बरामद गरी एक लाख ५९ हजार राजस्व सङ्कलन गरेको प्रहरी प्रमुख कार्कीले बताउनुभयो । लागूऔषध कारोबारमा एकजना प्रहरीसमेत संलग्न भएको पाइएको छ । धनुषा जिल्लाको इटरुवा प्रहरी चौकीमा कार्यरत प्रहरी जवान दिवाकर राई लागुऔषधसहित पक्राउ परेका हुन् ।
यही साता भरतपुर–१० घर भएका प्रहरी जवान राईसमेत तनहुँका आशिष कायस्थ, चितवन भरतपुरका विनोद गुरुङ र जेरेन चौधरी पक्राउ, चितवन जगतपुरका सन्दीप गुरुङ, मेघौलीका विजय महतो, भरतपुर–११ का मैच्याङ लामा र अमरदीप आलेलाई पक्राउ गरिएको छ ।