विश्व नारी सम्मेलनलाई दस लाख

काठमाडौँ । त्रिमूर्ति निकेतनले आगामी चैतको अन्तिम साता काठमाडौंमा आयोजना गर्ने विश्व नारी नेपाली साहित्य सम्मेलनका लागि नेपाल सरकारले रु दश लाख प्रदान गरेको छ । मन्त्रिपरिषद्को गत साताको निर्णयबमोजिम निकेतनलाई आज चेक प्राप्त भएको निकेतनका सदस्य सचिव नरेन्द्रराज प्रसाईले जानकारी दिनुभयो ।
आगामी चैत २८ देखि ३० गतेसम्म काठमाडौंँमा आयोजना हुने सो सम्मेलनमा नेपालका १४ अञ्चल र विभिन्न २२ मुलुकका गरी तीन सय ५० जना नारी स्रष्टाको सहभागिता हुनेछ ।  सम्मेलनमा कम्तीमा एक  कृति प्रकाशन गरेको नारी स्रष्टालाई अभिलेखीकरण (अङ्कित) हुने गरी प्रकाशन पनि गरिने प्रसाईंले बताउनुभयो ।
सम्मेलनको आयोजनाका लागि डा  गार्गी शर्माको संयोजकत्वमा ५५ सदस्यीय केन्द्रीय आयोजक समिति गठन गरिएको छ । रासस