बजेटमा सडक मर्मतलाई प्राथमिकता

रत्ननगर । रत्ननगर नगरपालिकाले आर्थिक वर्ष २०७१÷७२ लाई सडक मर्मत वर्षको रूपमा विकासका योजनाहरुलाई अगाडि बढाउने भएको छ । १८ औं नगरपरिषद्बाट पारित गरिएको बजेट सार्वजनिक गर्न बुधबार आयोजित पत्रकार सम्मेलनमा चालु आर्थिक वर्ष ढल मर्मत वर्षको रूपमा विकासका योजना अघि सारेको नगरपालिकाले २०७१÷७२ लाई भने सडक मर्मत वर्षको रूपमा मनाउन लागेको हो ।
नगरपालिकाभित्र १५० किलोमिटर कालोपत्रे सडक रहेको र तिनीहरुको स्तरोन्नती तथा मर्मतलाई आगामी वर्षको बजेटमा उच्च प्राथमिकता दिइएको नगरपालिकाका कार्यकारी अधिकृत सहदेवप्रसाद श्रेष्ठले बताउनुभयो । चालु आर्थिक वर्षभन्दा करिव २ करोड ५० लाख बढी बजेट ल्याएको नगरपालिकाले विकास निर्माणलाई प्राथमिकता दिएको उहाँले जानकारी दिनुभयो ।
चालु आर्थिक वर्षमा एलसीडीपी कार्यक्रम नआएर आर्थिक वर्ष २०७०÷७१ का लागि साढे ८ करोड बजेट विनियोजन गरेको नगरपालिकाले आव २०७१÷७२ मा एलजीसीडीपी कार्यक्रम आएपछि बजेट थपिएको कार्यकारी अधिकृत श्रेष्ठले बताउनुभयो ।
नगरपालिकाले पुस २२ गते नगर परिषद सम्पन्न गरी पारित गरेको १० करोड ९५ लाख बजेट सार्वजनिक गरेको हो । नगरपालिकाले २ करोड २५ लाख आन्तरिक श्रोतबाट र ८ करोड ६९ लाख बाह्य श्रोतबाट जुटाइने लक्ष्य राखिएको नगरपालिकाका कार्यकारी अधिकृत सहदेवप्रसाद श्रेष्ठले जानकारी दिनुभयो ।
प्रशासनिक खर्चतर्फ नगरपालिकाले १ करोड ९९ लाख र विकास निर्माणतर्फ ८ करोड ९१ लाख रूपैयाँ विनियोजित गरेको छ । नगरपालिकाले सपिङ कम्प्लेक्सको निर्माणका लागि जग्गा खरिद गर्न १ करोड, सडक निर्माणको लागि २ करोड र प्रत्येक वडाका लागि कम्तीमा १० लाखको वडास्तरीय योजना पारित गरेको लेखा अधिकृत सीताराम पोखरेलले बताउनुभयो ।
नगरपालिकाले आव २०७१÷७२ को लागि कृषिमा २५, पूर्वाधार निर्माणमा ३५, स्वास्थ्यमा १०, महिला विकासमा १० बालबालिकाको क्षेत्रमा काम गर्न १५ र आदिवासी जनजाति तथा मुस्लिम, पिछडा वर्गको लागि पनि त्यतिकै रकम विनियोजन गरेको छ । बजेटमा कृषि तथा पशुपालनमा विशेष जोड दिइएको छ भने सडक मर्मत, पर्यापर्यटन, बालबालिका, ज्येष्ठ नागरिक, जनजाति, आदिवासी, पछाडी पारिएको वर्गलाई समेत समेटर बजेट विनियोजन गरेको जनाएको छ । नगरपालिकाले कर सेवा शुल्कजस्ता विषयमा चालु वर्षकै योजनालाई निरन्तरता दिएको जनाएको छ ।

‘गाडी दुरूपयोग होइन’

रत्ननगर । रत्ननगर नगरपालिकाले आफ्ना कर्मचारीहरुले नगरपालिकाको गाडी दुरूपयोग गरेको घटनाको खण्डन गरेको छ । आर्थिक वर्ष २०७१÷७२ को बजेट सार्वजनिक गर्न बुधबार आयोजित पत्रकार सम्मेलनमा नगरपालिकाका कार्यकारी अधिकृत सहदेवप्रसाद श्रेष्ठले गाडी दुरूपयोग गरेको नभई अराजक समूहले गाडीमाथि तोडफोड गरेर क्षति पु¥याएको आरोप लगाउनुभयो ।
नगरपालिकाको बजेट निर्माणको क्रममा ल्याण्डफिड साइडको व्यवस्थापन तथा पर्यटकीय पूर्वाधार निर्माणको लागि सम्भाव्यता अध्ययन गर्न जाँदा नगरपालिकाका कर्मचारीले प्रयोग गरेका गाडी तोडफोड गरिएको उहाँको भनाइ थियो । नगरपालिकाका योजना शाखा प्रमुख प्रकाशचन्द्र ढुंगाना, लेखा अधिकृत सीताराम पोखरेल र सामुदायिक विकास शाखा प्रमुख तोरणराज पौडेललाई आफूले नै काममा पठाएको उहाँले बताउनुभयो । गत पुस १९ गते रत्ननगरको मंगलपुरमा नगरपालिकाका कर्मचारी चढेर गएको नगरपालिकाको गाडी तोडफोड भएको थियो ।