माछापालनमा ४० हेक्टर विस्तार

भरतपुर । चितवनमा पछिल्ला वर्षहरूमा माछा पाल्ने कृषकको सङ्ख्या बढ्न थालेपछि नेपाल सरकारले समेत आवश्यक अनुदान दिएर माछापालनका लागि क्षेत्र विस्तारको कार्यक्रम सुरु गरेको छ ।
चितवनमा यस वर्ष माछापालनका लागि ४० हेक्टर क्षेत्रफल विस्तार गर्न प्रक्रिया सुरू भएको छ । जिल्लामा विभिन्न क्षेत्रमा विस्तार कार्यक्रमका लागि जिल्ला कृषि विकास कार्यालय चितवनले अनुगमन थालेको वरिष्ठ कृषि विकास अधिकृत राजाराम अधिकारीले जानकारी दिनुभयो ।
उहाँका अनुसार मंगलबारमात्रै चितवनको माडी क्षेत्रको स्थलगत रुपमै माछापालनका लागि आवश्यक क्षेत्र छ छैन भन्ने विषयमा अनुगमन गरेको छ । यस वर्ष रु ४० लाख बजेट क्षेत्र विस्तारका लागि जिल्लामा आएको छ । यो रकम नयाँ क्षेत्रमा लगानी गर्ने अधिकारीले बताउनुभयो । क्षेत्र विस्तारका लागि चितवनका विभिन्न समूहबाट २८ समूहले निवेदन दिएकाले अहिले ती समूहले छनोट गरेको क्षेत्र उपयुक्त छ छैन भन्ने विषयमा प्राविधिक टोलीले अनुगमन गरिरहेको छ ।
अनुगमन सकिएपछि माघको पहिलो साताबाट फिल्डमै काम सुरु गर्ने चितवनका कृषि कार्यालय प्रमुख राजाराम अधिकारीले जानकारी दिनुभयो । अहिले जिल्लामा माछापालन व्यवसाय फस्टाएको र कृषकसमेत आकर्षित भएकाले कार्यक्रम ल्याइएको हो ।
यहाँको पिप्ले, माडीका विभिन्न गाविस, कुमरोज, रत्ननगर, दिव्यनगर, पटिहानीलगायत गाविसमा यस वर्ष क्षेत्र विस्तार गरिने भएको छ । जिल्लामा अहिले करिब ३०० हेक्टरमा माछापालन भइरहेको छ ।
जिल्लामा यो वर्ष क्षेत्र विस्तार कार्यक्रमसहित गरेर कुल १०० हेक्टर थपिने सम्भावना रहेको कृषि कार्यालयले जनाएको छ । जिल्लामा अहिले प्रतिहेक्टर चार टन वार्षिक माछा उत्पादन हुने गरेको तथ्याङ्क छ ।
अहिले जिल्लामा जिउँदो माछाको बिक्री सुरू भएकाले समेत उभोक्ताहरू माछामा आकर्षित छन् । कृषि कार्यालयले यस वर्ष नयाँ पोखरी निर्माण गर्न छनोटमा परेका कृषक समूहलाई प्रतिहेक्टर रु एक लाख सहयोग गर्ने जनाएको छ ।