सर्वाधिक पुरस्कारको फुटबल प्रतियोगिता

भरतपुर । अखिल नेपाल राष्ट्रिय स्वतन्त्र विद्यार्थी युनियन वीरेन्द्र बहुमुखी क्याम्पसको आयोजनामा राष्ट्रव्यापी अन्तरकलेज खुल्ला नकआउट फुटबल प्रतियोगिता हुने भएको छ । माघ १६ गते सहिद दिवसको अवसरमा सोही दिनदेखि सुरू हुने राष्ट्रिय फुटबल प्रतियोगिता सम्पन्न गर्न स्ववियु सभापति निरज भट्टलाई संयोजकको जिम्मेवारी दिइएको छ ।
आइतबार बसेको अनेरास्ववियु क्याम्पस कमिटीको बैठकले प्रतियोगितालाई भव्यरूपमा सम्पन्न गर्न दस सदस्यीय स्टेरिङ कमिटी गठन गरेको अनेरास्ववियु वीरेन्द्र बहुमुखी क्याम्पसका अध्यक्ष विमल केसीले जनाकारी दिनुभयो ।
स्टेरिङ कमिटीको सदस्यहरुमा सुदीप रेग्मी, निरज भट्ट, देवप्रसाद पाठक, सहनशील लामा, रोहित सुवेदी, प्रकाश भट्ट, सुरज ज्ञवाली, सविना चौलागाई, विमल केसी र लीलाराम पौडेल रहनुभएको छ । फुटबल खेलको विकास र खेलाडीहरुको मनोवललाई उच्च राख्नको लागि चितवनकै ईतिहासँमा हालसम्मकै सर्वाधिक पुरस्कार राशी भएको खेल आयोजना गर्न लागिएको कार्यक्रम संयोजक भट्टले जानकारी दिनुभयो । प्रतियोगितामा प्रथम हुने समूहलाई नगद ७०,०००  सहित शिल्ड र प्रमाणपत्र त्यसैगरी द्वितीय हुने समूहलाई नगद ४०,००० सहित शिल्ड र प्रमाणपत्र प्रदान गरिने आयोजकले जनाएको छ । त्यसैगरी सर्वाधिक गोलकर्ता, उत्कृष्ट खेलाडीलाई पनि नगद पुरस्कारले सम्मान गरिने बताइएको छ ।