साना किसान बछौली नाफामा

बछौली । साना किसान कृषि सहकारी संस्था बछौलीले एक वर्षमा ४२ लाख नाफा गर्न सफल भएको छ ।
शनिबार संस्थाको १६ औं वार्षिक साधारण सभामा प्रस्तुत गरिएको आर्थिक प्रतिवेदनले आर्थिक वर्ष २०६९÷७० मा १ करोड ९७ लाख ७९ हजार आम्दानीमा १ करोड ५५ लाख ७८ हजार खर्च कटाएर ४२ लाख ११ हजार खुद नाफा गरेको उल्लेख गरिएको छ । कृषि, साना व्यवसाय, वैदेशिक रोजगार, पशुपालन, उद्योग भवन निर्माणलगायतका कार्यमा समूहमार्फत ऋण लगानी गर्दै आएको सो संस्थाले अहिलेसम्म १२ करोड ७३ लाख ऋण लगानी गरिसकेको संस्थाका प्रबन्धक रामहरि दाहालले जानकारी दिनुभयो ।
सो संस्थाले एक वर्षमा आम्दानी गरेको रकमबाट शेयर सदस्यहरुलाई कारोबारको आधारमा २० लाख शेयर लाभांश वितरण गर्ने योजना रहेको उहाँले जानकारी दिनुभयो । कृषि सहकारी संघ चितवनका जिल्ला सदस्य तेजप्रसाद बर्तौला प्रमुख अतिथि रहनुभएको  कार्यक्रममा लेखा समितिका संयोजक लवचन्द्र अधिकारीले आर्थिक तथा प्रगति प्रतिवेदन तथा संस्थाका प्रबन्धक रामहरि दाहालले आगामी वर्षको नीति तथा कार्यक्रम प्रस्तुत गर्नुभएको थियो ।
कार्यक्रममा उत्कष्ट ४ वटा अन्तर समूह, बढी शेयर भएका ४ जना, बढी बचत गर्ने महिला समूह तथा एक दर्जन उत्कृष्ट कृषकहरुलाई साधरणसभाको अवसरमा सम्मान तथा पुरस्कृत गरिएको थियो । संस्थाका अध्यक्ष गोपी लम्सालको अध्यक्षतामा भएको कार्यक्रममा शेयर सदस्य गोविन्दराज नेपाल, मृगकुञ्ज मध्यवर्ती उपभोक्ता समितिका अध्यक्ष बासुदेव चापागाई, जनप्रगति सहकारी संस्थाका लेखा समिति संयोजक गोविन्दप्रसाद रिजाल, जनकौली मध्यवर्ती सामुदायिक वनका उपाध्यक्ष घनश्याम तिमल्सिना, बछौली उच्च माविका प्राचार्य शिवराम मरहठ्ठा, पूर्वअध्यक्ष हरिनारायण अधिकारी, संस्थाकी उपाध्यक्ष देवकी अधिकारीलगायतले बोल्नुभएको थियो ।
त्यस्तै, वीरेन्द्रनगरमा रहेको साना किसान कृषि सहकारी संस्था लिमिटेडको अध्यक्षमा पुनः हरिप्रसाद पौडेल चयन हुनु भएको छ । संस्थाको शनिबार सम्पन्न १८ औं वार्षिक साधारण सभा तथा छैटौ अधिवेशनले पौडेलको अध्यक्षतामा १३ सदस्यीय कार्यसमिति चयन सर्वसम्मत चयन गरेको हो । संस्थाको उपाध्यक्षमा वालानन्द कँडेल तथा सदस्यहरुमा कमला पुन, भुवानीप्रसाद कँडेल, भोलानाथ भुषाल, रामप्रसाद नेपाल, कृष्णमाया पुडासैनी चयन भएका छन् ।