गुरु नै बेइमान भएपछि ……………………..

परीक्षा दिँदै गर्दा विद्यार्थीको कापी खोसियो[divider]

-दिपेन्द्र अधिकारी
भरतपुर । भरतपुरका विभिन्न निजी विद्यालयमा अध्ययनरत विद्यार्थीहरु शुक्रबार दिउँसो भरतपुर गेष्ट हाउस चौरमा भेटिए । सनराइज, अर्किड र अमर एभरेष्ट बोर्डिङका ती विद्यार्थीहरु आपसमा खेल्दै थिए ।
खेल्दै गरेका इमान गुरुङले भने ‘परीक्षा दिँदै गर्दा गुरु आएर कापी नै थुतेर लैजानु भयो, हामी घर फर्कियौँ ।’ अमर एभरेष्ट बोर्डिङका कक्षा ४ मा अध्ययनरत गुरुङ शुक्रबार कम्प्युटर विषयको जाँच दिँदै गर्दा गुरुले नै उत्तरपुस्तिका थुतेको बताउँदै थिए ।
त्यस्तै सनराइज बोर्डिङमा कक्षा ६ मा पढ्ने मन्दीप राना शुक्रबार परेको नेपाली विषयको परीक्षा दिन स्कुल पुगेका मात्र के थिए, बन्द भनेपछि तुरुन्तै घर फर्किए । राना भन्दै थिए,‘सरहरुले नै बन्द गराउनु भएको रे ।’
अर्किड बोडिङमा कक्षा ४ मा पढ्ने युडी सुनारले बन्दको दिन पनि विद्यालय आएको भनी गुरुहरुले हप्काएको बताए । ‘रक्षक नै भक्षक’ भने झैँ गुरुहरु नै स्कुल बन्द गर्न अघि सर्नु लज्जास्पद काम भएको अभिभावकले बताए । अनुशासनको पाठ सिकाउने नै अनुशासनहीन भएको अभिभावकको भनाइ छ ।
प्रायजसो अरुको बन्दबाट पीडित बनेका विद्यार्थीहरु पुनः एकपटक आफ्नै गुरुहरुले गरेको स्कूल बन्दको शिकार बने । गुरुहरुको हिजोको बन्द कार्यक्रम पहिलो भने होइन तर अनौठो भने थियो । किनकि परीक्षाकै बीच ती गुरुहरु नैतिकताको ख्याल नगरी विद्यालय बन्द गराउन अग्रसर थिए ।
परीक्षाको तयारीमा रहेका निजी विद्यालयका विद्यार्थीहरु शुक्रबार अलमलमा परे । परीक्षा दिन जाने कि नजाने । चितवनका निजी स्कुलमा हाल यस शैक्षिक सत्रको तेस्रो परीक्षा चलिरहेको छ । बेमौसमी बाजा भनेजस्तै परीक्षा चलिरहँदा निजी स्कुलका शिक्षकहरुको संगठनले अकस्मात स्कुल बन्द गरेपछि विद्यार्थीहरु समस्यामा परेका हुन् ।
नारायणगढ न्युरोडका गणेश वर्माले भने, अरुले बन्द गर्दा विरोध गर्नुपर्नेमा आफै बन्द गर्न अग्रसर हुनुले गुरुहरुको नियत खराव छ भन्ने बुझिन्छ ।’ दुई वर्षअघि विद्यालयलाई शान्ति क्षेत्र घोषणा गरिए पनि त्यो घोषणामा मात्र सीमित भएको छ ।
निजी विद्यालयमा आफ्नो अस्तित्व देखाउन चितवनका निजी स्कुलमा नेपाल इस्टु र इस्टु नेपाल नामक दुई शिक्षक संस्था रहेको छ । प्याब्सनसँग भएको सम्झौता कार्यान्वयन नभएको भन्दै नेपाल इस्टुले अनिश्चितकालीन विद्यालय बन्दको आह्वान् गरेको छ ।
इस्टुको आह्वान्सँगै शुक्रबारदेखि चितवनका १५९ विद्यालयका झन्डै सात हजार विद्यार्थीको पठनपाठन प्रभावित भएको छ भने संस्थागत विद्यालयमा जारी आन्तरिक परीक्षासमेत अन्योलमा परेको छ ।
इस्टु चितवनका अध्यक्ष विष्णुबहादुर भुजेलले आफूहरूसँग भएको सम्झौता कार्यान्वयन गर्नका लागि दबाब दिने उद्देश्यले बाध्य भएर विद्यालय बन्द गरेको बताए ।
आन्दोलनरत शिक्षकहरुले १८ प्रतिशत तलबमा वृद्धि तथा एक हजार भत्ता उपलब्ध गराउनुपर्ने माग गर्दै आएका छन् । शिक्षकहरुजस्तो बौद्धिक जमातले विद्यालय बन्द गराएको भन्दै सरोकारवालाहरुले बन्द फिर्ता लिएर समस्याको समाधान खोज्न आग्रह गरेका छन् ।