वाग्ले र गौतमको उम्मेदवारी

नारायणगढ । उवासंघ चितवनको १७ औं कार्यसमिति चयनका लागि आगामी पुस २९ र ३० गते साधारणसभा हुँदैछ । संघमा तीन कार्यकाल सदस्य रही बीचमा एक कार्यकाल उपाध्यक्ष पदमा पराजित भएका र अघिल्लो चुनावमा पछि हटेका श्रीभक्त अच्यूत वाग्ले अध्यक्ष पदका लागि अघि बढेका छन् ।
बुधबार पत्रकार सम्मेलन गरी वाग्लेले भने, ‘अध्यक्ष पदका लागि मेरो उम्मेदवारी पक्का भएको छ ।’ त्यस्तै सोही पत्रकार सम्मेलनमा बोल्दै हाल कार्यसमितिको सदस्य पदमा रहेका राजन गौतमले आफू वरिष्ठ उपाध्यक्षमा लड्ने बताए । उवासंघ चितवनमा हुने नेतृत्व चयनको परम्परालाई तोड्दै आमव्यवसायीको माग र हितका लागि आफूहरु कटिबद्ध रहेको उम्मेदवार द्वयले बताए । उनीहरुको उम्मेदवारी घोषणासँगै उवासंघको आगामी नेतृत्व चयन निकै रोचक हुने देखिन्छ ।
वाग्लेले अध्यक्षमा उम्मेदवारी घोषणा गरेसँगै उनको प्रतिस्पर्धा हालका वरिष्ठ उपाध्यक्ष कल्याण जोशीसँग हुने देखिन्छ । त्यस्तै, वरिष्ठ उपाध्यक्षमा जाने लाइनमा रहेका सहनलाल प्रधानसँग गौतमको प्रतिस्पर्धा हुने देखिन्छ ।
कार्यसमितिको सदस्य पदमा रहेका बद्री अधिकारी, चिरञ्जीवी सुवेदी, चुननारायण श्रेष्ठ, सुमन श्रेष्ठ, देवेन्द्र श्रेष्ठ, खोमकान्त रेग्मी र प्रद्युम्न सापकोटा चुनावी मैदानमा उत्रने पक्का भएको छ । कतिपयले प्रचारप्रसार पनि थालिसकेका छन् ।