चौबीसै घण्टा प्रसूति सेवा !

बछौली । बछौली स्वास्थ्य चौकीमा बुधबारदेखि चौबीसै घण्टा प्रसूति सेवा सुरू भएको छ । स्वास्थ्य चौकीको सभाहलमा आयोजित कार्यक्रममा जिल्ला जनस्वास्थ्य कार्यालय भरतपुरका प्रमुख केयरसिंह गोदारले प्रसूति सेवाको उद्घाटन गर्नुभएको थियो ।
गोदारले ग्रामीण क्षेत्रमा चौबीसै घण्टा प्रसूति सेवाको सुरूवात् हुनु सुखद भएको बताउनुभयो । बछौली स्वास्थ्यचौकीमा सुरू भएको सेवाले यस क्षेत्रका महिलाहरु लाभाम्वित हुनेमा आफू आशावादी रहेको उहाँको भनाइ छ । २०६८ सालबाट स्वाथ्यचौकीमा स्तरोन्नती भएको सो स्वास्थ्य चौकीमा प्रसूति सेवा सुरू भएसँगै स्थानीयहरु खुसी भएका छन् ।
स्वास्थ्यचौकी व्यवस्थापन समितिका अध्यक्ष एवम् बछौली गाविसका सचिव तेजेन्द्रनाथ लामिछानेको अध्यक्षतामा भएको कार्यक्रममा स्वास्थ्यचौकी प्रमुख प्रकाशकुमार चौधरी, अहेव मन्नुनाथ अधिकारी, व्यवस्थापन समितिका सदस्य भगवती विडारी, सामुदायिक व्यवस्थापन समितिका उपाध्यक्ष हरिप्रसाद रिजाल, स्रोत व्यक्ति नन्दकली चापागार्इंलगायतले बोल्नुभएको थियो ।