बस दुर्घटनामा १४ जनाको मृत्यु

सल्यान । सल्यानको बाँझकाँडा गाविस– १ मा आज बिहान बस दुर्घटना हुँदा आठ जनाको मृत्यु भएको छ भने ३७ जना घाइते भएका छन् ।
मृतक सबैको सनाखत भइसकेको छ । सो दुर्घटनामा मर्नेहरूमा बाँसकाँडा गाविस–१ सल्यानका २८ वर्षीया भूमा चलाउने, रुकुम खलङ्गा–१ का आनन्दकुमार केसी, सोही ठाउँका २२ वर्षीया करुणा घर्ती, मुरु–७ झुलखेत रुकुमका २६ वर्षीय प्रेमबहादुर बुढा मगर, दाङ घोराही घर भई रुकुम महेन्द्रदल गणमा कार्यरत नेपाली सेनाका हवल्दार ३७ वर्षीय राजेश बुढा, खलङ्गा–१ रुकुमका २३ वर्षीय सुजन शाही, रुकुम चौखावाङ–२ का २८ वर्षीय मानबहादुर बुढा र आठविसकोट रुकुमका प्रेमी बुढाका तीन वर्षीय छोरा रहेका छन् ।
सो दुर्घटनामा गम्भीर घाइते भएका १८ जनाको खलङ्गामा सामान्य उपचार गरी नेपालगन्ज पठाइएको छ भने बाँकीको खलङ्गा अस्पताल र शितलपाटीस्थित कान्तिपुर सामुदायिक अस्पतालमा उपचार भइरहेको छ । काठमाडाँैबाट रुकुम जाँदै गरेको लु१ख ८२९० नम्बरको रात्रिबस बिहान ५ बजे दुर्घटना भएको हो ।
त्यस्तै, पोखराबाट काठमाडौंतर्फ जाँदै गरेको जिप मंगलबार राति बन्दिपुर ६ चुनपहराबाट मर्स्याङ्दी नदीमा खस्दा ६ भारतीय पर्यटकको मृत्यु भएको छ । दुर्घटनामा चालकसहित अन्य ५ जना घाइते भएका छन् ।
मृत्यु हुनेहरुमा ५८ वर्र्षीय विनयकुमार तिवारी, १३ बर्र्षीय हेमन्त त्रिपाठी, ५६ वर्षीया कलावती तिवारी, ३३ वर्षीया पुनम त्रिपाठी, २० वर्षीया नेहा त्रिपाठी र ३६ वर्षीय मिलन त्रिपाठी रहेका छन् । मिलनबाहेकका उनीहरु सबैको घटनास्थलमा नै मृत्यु भएको हो । गम्भीर घाइते मिलनलाई थप उपचारका लागि काठमाडौं लैजादैं गर्दा बाटोमा नै मृत्यु भएको जिल्ला ट्राफिक ईन्चार्ज प्रहरी नायव निरिक्षक भेषराज रेग्मीले बताउनुभयो ।