सन् २०१४ लाई स्वागत

अङ्ग्रेजी क्यालेन्डरअनुसार नयाँ वर्ष सन् २०१४ आजदेखि सुरु भएको छ । विश्वभरका मानिसहरु यो वर्ष मनाउन तयारी गरिरहेका छन् । नेपालमा पनि यो वर्षको आगमनसँगै विविध कार्यक्रमका साथ स्वागत गरिँदैछ । सन् २०१३ मा भएका विविध उपलब्धिहरुको रक्षा र समीक्षा गर्दै नयाँ वर्षको आगमनसँगै नेपाली जनताले नयाँ अपेक्षा पनि गरिरहेका छन् । हुन त हरेक दिन नयाँ बनेर आउँछन्, जान्छन् । विगतका दिनहरु सबै ऐतिहासिक बन्न सक्दैनन् । तर, हरेक दिन उत्तिकै मह¤वपूर्ण र उपलब्धिमूलक बनाउन सके सबै वितेका दिनको ऐतिहासिकता झल्किन्छ । नेपालमा पनि सन् २०१३ उपलब्धिमूलक नै रह्यो । विश्व शान्ति, विकास, सुरक्षा तथा मानव स्वतन्त्रताको सवालमा सन् २०१३ प्रभावकारी नै रहेको मान्नुपर्छ । नेपालमा राजनीतिक स्थायि¤व र प्रजातान्त्रिक प्रक्रियालाई नवजीवन प्रदान गर्न गत मंसिर ४ गते संविधानसभाको दोस्रो निर्वाचन सफलतापूर्वक सम्पन्न भयो । सो निर्वाचनमा नेपालको इतिहासमै सबैभन्दा बढी ७३ प्रतिशत जनताले मतदान गरेर कीर्तिमान कायम गरे । यो निर्वाचनलाई ऐतिहासिक उपलब्धिका रुपमा लिइएको छ ।
सन् २०१३ नेपालले खेलकुदकै सबैभन्दा ठूलो उपलब्धि हासिल ग¥यो । विश्वकप ट्वान्टी–२० क्रिकेट प्रतियोगितामा प्रवेश गरी इतिहास रच्न सफल भयो । १९९६ देखि क्रिकेटमा प्रवेश गरेको नेपालले १७ वर्षपछि मात्रै विश्वकपको ढोका खोल्न सफल भएको हो । आगामी मार्चमा बंगलादेशमा हुने ट्वान्टी–२० विश्वकप क्रिकेटमा नेपाली टीमले खेल्नेछ । नेपालले सहश्राब्दी विकास लक्ष्यमा पनि मह¤वपूर्ण उपलब्धि हासिल गरेको छ । राष्ट्रिय योजना आयोगले सार्वजनिक गरेको प्रतिवेदनमा नेपालको गरिबी २३.८२ प्रतिशतमा झरेको उल्लेख छ । सन् २०१० मा गरिबी प्रतिशत २५.४ प्रतिशत रहेको थियो । सन् २०१५ सम्ममा नेपालको गरिबी २१ प्रतिशतमा झार्ने लक्ष्य लिइएको छ । यस्तै प्राथमिक शिक्षा, लंैगिक समानता र महिला सशक्तिकरण, शिशु मृत्युदर, सामाजिक सेवा, मातृ स्वास्थ्य, एचआइभी एड्स, औलो तथा अन्य रोग नियन्त्रणमा पनि उल्लेखनीय प्रगति भएको छ ।
यो वर्ष विश्वमा थुप्रै घटनाहरु भए । सन् २०१३ मा प्रजातन्त्रका शिखर पुरुष तथा रंगभेदविरुद्धको आन्दोलनका महानायक दक्षिण अफ्रिकाका पूर्वराष्ट्रपति नेल्सन मन्डलाको ९५ वर्षको उमेरमा निधन भयो । उनको योगदानबाट दक्षिण अफ्रिकी जनतालाई मात्रै होइन विश्वलाई नै शोकमा डुबाइदियो । छिमेकी भारतमा नयाँ शक्तिको रुपमा उदाएको आम आदमी पार्टीले आजैदेखि हरेक परिवारलाई मासिक २० हजार लिटर निःशुल्क पानी वितरण गर्ने निर्णय गरेको छ । भ्रष्टाचारविरुद्ध चर्को आवाज उठाउँदै आएको आम आदमीका नेता अरविन्द केजरीवालले मुख्यमन्त्रीको सत्ता सम्हालेको ४८ घन्टाभित्रै आफूले चुनावमा दिएको वचन पूरा गरेर सकारात्मक सन्देश दिएका छन् । अहिले नेपाली राजनीतिमा पनि केजरीवालको चर्चा गर्न थालिएको छ । हाम्रा नेताहरुले पनि जनतालाई दिएका आश्वासनहरु उदाहरणका रुपमा प्रस्तुत गर्नुपर्ने देखिएको छ । यो वर्ष शान्ति, सुरक्षा, विकासलगायत विकासका सबै तहमा महिला सहभागिता सुनिश्चित गर्दै उनीहरुको सशक्तिकरण गरी संवैधानिक तथा कानुनी रुपमा समानअधिकार दिनुपर्ने आवश्यकता छ । यस्तै यो वर्ष नयाँ लोकतान्त्रिक संविधान निर्माण गरी शान्ति प्रक्रियालगायत राजनीतिक गतिरोध तथा संक्रमणकालीन अवस्था अन्त्य हुन सकोस् नयाँ वर्ष सन् २०१४ को शुभकामना ।