हात्तीदौडको उपाधि बहादुरगजले उचाल्यो

होमनाथ सापकोटा
सौराहा । चितवन हात्ती महोत्सव तथा अन्तर्राष्ट्रिय प्रतियोगिताको उपाधि बहादुरगजले जितेको छ । चितवन राष्ट्रिय निकुञ्जको बहादुरगजले सोमबार भएको फाइनलमा प्रतिस्पर्धी पाँचवटा हात्तीलाई पछि पार्दै लगातार दोस्रो पटक उपाधि जितेको हो । बहादुरगजले निर्धारित ३०० मिटरको दूरी १ मिनेट ५ सेकेन्डमा पूरा गरी उपाधि कब्जा गरेको हो ।
बहादुरगजले २०६९ सालको प्रतियोगितामा पनि उपाधि जितेको थियो । पहिलो चरणका प्रत्येक खेलका प्रथम हुँदै फाइनलमा पुगेको बहादुरगज दौडमा निकै हौसिएको थियो । २० वर्षे बहादुरगजको कुशलताका कारण घरेलु टिम चितवन राष्ट्रिय निकुञ्जले उपाधि हात पारेको छ । एक महिला अघिदेखि प्रतियोगिताको तयारीमा लागेको थियो ।
‘मेरो हात्ती पहिलो हुन्छ भन्ने मलाइ पहिले नै विश्वास थियो’ बहादुरगजका माउते ठगा चौधरीले भन्नुभयो, ‘मेरो विश्वास बहादुरगजले पनि टुट्न दिएन’ । हात्ती दौडन माउतेको पनि हात हुने भन्दै उहाँले प्रतियोगिता जित्नु हात्तीको मात्र होइन मान्छेको पनि खुबी हो । प्रतियोगितामा हाइवे स्टारको एकताकली दोस्रो तथा फेवा टुर्स एण्ड ट्राभलको चम्पाकली तेस्रो भएको छ ।
चम्पाकली २०६८ सालको विजेता पनि हो । एकताकलीले १ मिनेट १९ सेकेन्ड र चम्पाकलीले १ मिनेट २० सेकेन्ड निर्धारित दूरी पूरा गरेका थिए । फाइनलमा १ विदेशीसहित ६ वटा हात्तीबीच फाइनल प्रतिस्पर्धा भएको थियो । प्रतियोगितामा भने २० वटा हात्ती सहभागी थिए । त्यस्तै, हात्ती महोत्सव अन्र्तगत आयोजित हात्तीका छावाहरुको रोमाञ्चकारी फुटबल प्रतियोगिताको उपाधि लायन्स क्लब इन्टरनेशनलले जितेको छ ।
फाइनल खेलमा लायन्सले गत वर्षको विजेता किष्ट बैंकलाई २–१ गोल अन्तरले हराएको हो । लायन्स गत वर्ष किष्ट बैंकसँग पराजित भएको थियो । लायन्सको जितमा दुवै गोल लक्ष्मणगजले गरेको थियो । लक्ष्मणले खेलको दोस्रो मिनेटमा गोल गर्दै अग्रता दिलायो भने दोस्रो गोल १२ औं मिनेटमा गरेको थियोे ।
किष्टका लागि सान्त्वना गोल भने सिमसिमकलीले खेलको अतिरिक्त समयको ३६ सेकेन्डमा ग¥यो । महोत्सवमा टाँगा दौड, गाढा दौड, डुङ्गा दौड प्रतियोगिता भएको थियो भने साँस्कृतिक कार्यक्रमको पनि आयोजना गरिएको थियो । क्षेत्रीय होटल संघ सौराहाको आयोजनामा गत पुष ११ गतेदेखी सुरू भएको चितवन हात्ती महोत्सव सोमबार सकिएको छ ।
चितवन राष्ट्रिय निकुञ्जका प्रमुख संरक्षण अधिकृत कमलजंग कुँवरको प्रमुख आतिथ्य एवम संघका अध्यक्ष नारायण भट्टराईको अध्यक्षतामा भएको समापन कार्यक्रममा महोत्सवका संयोजक ज्ञानेन्द्रकुमार विष्टले प्रतियोगिताको उद्देश्यका बारेमा प्रकाश पार्नुभएको थियो ।
सांस्कृतिक कार्यक्रमतर्फ चर्चित हास्य कलाकारद्वय दीपकराज गरी, दीपाश्री निरौला तथा गायकहरु प्रमोद खरेल, मिलन लामा, नेत्रजी पन्तलगायतले गीत प्रस्तुत गरेका थिए ।