दुई स्रष्टा सम्मानित

देवघाट । कवि शिरोमणि लेखनाथ पौड्यालको १३० आंै जन्मजयन्तीको अवसमा चितवन साहित्य परिषदले कृष्णकुमारी गुरूङ स्मृति पुरस्कारबाट दुई जना स्रष्टालाई सम्मान गरेको छ ।
सोमबार देवघाटमा कार्यक्रम गरी परिषदले डा निर्माेही व्यास र प्राध्यापक डा नारायणप्रसाद खनाललाई पुरस्कार प्रदान गरेको हो । व्यासको ‘बोधिवृक्षको छायाँमा’ कवितासंग्रह तथा खनालको ‘नागपञ्चमी’ निबन्धसंग्रहका लागि पुरस्कार प्रदान गरेको परिषदकी अध्यक्ष गायत्री श्रेष्ठले बताउनुभयो ।
कार्यक्रममा बागीश्वरी अंक २१ सार्वजनिक गर्नुका साथै अन्तर्राष्ट्रिय नेपाली साहित्य समाज जापानको मुखपत्र साकुरा फुल्दा कृतिको विमोचनसमेत गरिएको थियो । कार्यक्रममा कवि लेखनाथ पौडेलको बारेमा चर्चा गर्नुका साथै पौडेलप्रति समर्पण गरिएका रचनाहरु वाचन गरिएका थिए ।
आत्रेय गोत्र पौडेलवंश अनुसन्धान प्रतिष्ठान देवघाटको सहआयोजनामा सम्पन्न कार्यक्रममा देवघाटमा रहेको लेखनाथ पौड्यालको प्रतिमामा माल्यार्पण समेत गरिएको थियो । साहित्यकार रामबाबु घिमिरे प्रमुख अतिथि रहनु भएको कार्यक्रमको अध्यक्षता परिषद्की अध्यक्ष गायत्री श्रेष्ठले गर्नुभएको थियो । कार्यक्रममा आमन्त्रित अध्यक्ष कृष्णप्रसाद पौडेलले अक्षयकोष स्थापनाका लागि परिषदलाई १ लाख ५० हजार रूपैयाँ दिने घोषणा गर्नुभयो ।