अर्का आरोपि पनि मुद्दा नचली छुटे

भरतपुर । गोरखा फुजेलका कृष्ण अधिकारी हत्या आरोपमा गिरफ्तार अजिव भनिने परशुराम पौडेल पनि अदालतमा मुद्दा दायर नभइ आइतबार साँझ हिरासत मुक्त भएका छन् । सो प्रकरणमा यसअघि गिरफ्तार भएका रामप्रसाद अधिकारी पनि मुद्दा नै नचली छुटेका थिए ।
‘हामीले अनुसन्धान पूरा गरेर जिल्ला न्यायाधीवक्ताकोमा फाइल पठाएका थियौं । जुन अनुशन्धानका आधारमा मुद्दा चलाउन प्रमाण नपुग्ने भन्दै न्यायाधीवक्ताको निर्देशनमा छाडेका हौं’ चितवन जिल्ला प्रहरी कार्यालयका प्रवक्ता डिएसपी सञ्जय राउतले भने । उनी हाजिरी जवानीमा छुटेको र खोजेको बखतमा उपश्थित हुने सर्त राखेको राउतले जानकारी दिए ।
पौडेल मंसिर २१ मा गिरफ्तार भएका थिए । अधिकारी भदौ २१ मा गिरफ्तार भएका थिए ।
दुवै २५ दिनसम्म प्रहरी हिरासतमा बसेका छन् । अनुशन्धानका लागि प्रहरीले बढीमा २५ दिनसम्म हिरासतमा राख्न पाउँछ ।
हजुर बुबाआमा भेट्न गोरखाबाट चितवन आएका कृष्णको शसस्त्र युद्धका बेला ११ वर्षअघि माओवादीले हत्या गरेको थियो । सो हत्या विरुद्ध तत्कालै प्रहरीमा उजुरी दिए पनि कारवाही प्रकृया सुरु भएको थिएन । कृष्णका बुबा नन्दप्रसाद र आमा गंगामायाले काठमाडौंमा अनशन सुरू गरेपछि गएको भदौं २१ मा ११ आरोपितमध्येका एकजना रामप्रसाद अधिकारी समातिएका थिए ।
खुलम खुला हिड्दै आएका पौडेल एका एक समातिएका थिए ।     रामप्रसाद अधिकारी जस्तै मुद्दा नचली पौडेल पनि रिहा हुने सम्भावना सुरुमै आँकलन गरिएको थियो । त्यस्तो अवस्था दोहरीने सम्भावना बढेपछि अधिकारकर्मीहरु सक्रिय बनेका थिए ।
हत्या विषयमा चितवन प्रहरीले गरेको अनुशन्धान प्रकृयाको अनुगमनका लागि राष्ट्रिय मानव अधिकार आयोगको टोली शुक्रबार चितवन आएको थियो । तर पुर्व अनुमान अनुरुप नै अजिव आइतबार साँझ सात बजे हिरासत मुक्त भए ।
२०६२ सालको मंसिर २६ मा नुरप्रसाद अधिकारीले आफ्नो भाइको हत्यामा संलग्न हुनेहरु ११ जनाको नाम नै किटान गरेर चितवन प्रहरीमा उजुरी दिए । सो मुद्दामा किटानी जाहेरी परे पनि हालसम्म नसमातिएका व्यक्तिहरुमा रामप्रसाद अधिकारी नै नाम गरेका गोरखाका एकजना पनि छन् ।
त्यस्तै गोरखाका छविलाल पौडेल, मेघनाथ पौडेल, विष्णु तिवारी, सुभद्रा अधिकारी, सिता अधिकारी, कालिप्रसाद अधिकारी, हिमलाल अधिकारी, भिमसेन पौडेल पनि प्रहरीको भनाइमा फरार रहेका छन् ।