चिसोमा न्याना कपडा देऊ

चितवनमा जाडो बढेसँगै जनजीवन प्रभावित भएको छ । चिसोले सबैभन्दा बढी बालबालिकालाई प्रत्यक्ष असर पु¥याएको छ । ग्रामीण क्षेत्रका प्रसूति केन्द्रमा जन्मिने शिशुलाई निःशुल्क दिइने न्याना कपडा वितरण नहुँदा स्वास्थ्यसम्बन्धी जटिल समस्या देखिने सम्भावना बढेको छ । जिल्ला जनस्वास्थ्य कार्यालयले समयमै काम सम्पन्न नगर्दा भर्खरै जन्मिएका शिशुलाई कपडा उपलब्ध गराउन समस्या परिरहेको छ । जनस्वास्थ्य कार्यालयले संविधानसभाको चुनावका कारण समयमै न्याना कपडा वितरण गर्न नसकिएको धारणा राखेको छ । चितवनमा रहेका १८ वटा प्रसूति केन्द्रमध्ये ग्रामीण क्षेत्रमा रहेका केन्द्रहरुमा स्वास्थ्य सेवा विभागले न्यानो कपडा वितरणका लागि रकम विनियोजन गर्दै आए पनि सो सुविधाका लागि छुट्याइएको रकमसमेत खर्च हुन सकेको छैन ।
चितवनमा वार्षिक १२ हजार शिशु जन्मिने गरेका छन् । सरकारले बाल मृत्युदर घटाउन शिशुका लागि न्यानो कपडा वितरण गर्नेे कार्यक्रम लागू गरेको थियो । सरकारले जिल्ला जनस्वास्थ्य कार्यालयमार्फत ग्रामीण भेगका प्रजनन् केन्द्रबाट प्रतिशिशु १३ थान सिलाइ गरेका कपडा र सुत्केरी आमाका लागि एक थान कपडा उपलब्ध गराउने व्यवस्था गरेको थियो । गरिब तथा विपन्न समुदायका लागि यही सहयोग पनि ठूलो हुन्छ । तर, कार्यक्रम प्रभावकारी ढंगले सम्पन्न नहुँदा सरकारले व्यवस्था गरेको यो सहयोग झारा टार्ने खालको देखिन्छ । विपन्नका लागि सरकारले मातृशिशु दुवैका लागि पर्याप्त सहयोग गर्नुपर्ने देखिन्छ । उसो त, जाडोले चितवनको जनजीवन कष्टप्रद भइरहेको छ । चितवनका पहाडी गाविस, मुसहर बस्ती, सुकुमबासी बस्तीलगायतका गाविसहरुमा बालबालिकाहरुको बिचल्ली भएको छ । अझ विपन्न समुदायमा रहेका सुत्केरी आमा तथा शिशुको अवस्था दयनीय बनिरहेको छ । यस्तो अवस्थामा सरकारी तवरबाट पर्याप्त सहयोग हुन सकिरहेको छैन ।
केही सामाजिक संघसंस्थाहरुले यदाकदा बालबालिकालाई जाडोका कपडा वितरण गरेर एउटा प्रशंसनीय कार्य थालनी गरेका छन् । तर, कष्टकर जीवन बिताउन विवश भएका ग्रामीण क्षेत्रका बालबालिकालाई नियमित रुपमा न्याना कपडा वितरण गर्नुपर्ने देखिएको छ । चितवनमा सयौँको संख्यामा त्यस्ता सामाजिक तथा सहकारी संस्था सञ्चालनमा छन् । आर्थिक अवस्था सबल भएका यस्ता संस्थाहरुले हरेक चिसो मौसममा शिशु तथा बालबालिकालाई मानवीय सहयोग गर्नु जरूरी देखिन्छ । अहिले केही मनकारी व्यक्ति तथा संस्थाले विपन्न समुदायका बालबालिकालाई सहयोग गरेर आफ्नो जन्मदिन मनाउने सकारात्मक सुरूवात पनि गरेको देखिन्छ । चितवनमा धन र मन भएका व्यक्ति तथा संस्थाहरु हजारौँ छन् । उनीहरुले जाडोमा लुगलुग काँपेर बाँचेका बालबालिकाका लागि न्याना कपडा वितरण गरेर मानवीय धर्म निर्वाह गर्नुपर्ने आवश्यकता देखिन्छ ।