नाम फरक परेपछि अपराध ओझेलमा

दिपेन्द अधिकारी
भरतपुर । जिल्ला प्रहरी चितवनले आफूहरुको सर्वाधिक खोजी सूचीमा रहेको फरार अभियुक्तमध्ये हत्या अभियोग र ज्यान मार्ने उद्योगमा मुद्दा लागेका एक युवालाई पक्राउ गरेको छ । सो पक्राउलाई प्रहरीले अपराध अनुसन्धानमा थप सफलता हात पारेको पत्रकार सम्मेलन गरेर जानकारी दिएको छ ।
तर उल्लेखित दुई मुद्दाका फरार अभियुक्त भनिएका ती युवाको नाम प्रहरीले तयार पारेको मिसिल, युवकले अदालतसमक्ष दिएको बयान र युवकको विभिन्न परिचय खुल्ने प्रमाण जुटाउँदा नाम फरक पर्न गएको हो । ‘नाम फरक परे पनि व्यक्तिचाहिँ पक्राउ गरिएका युवा नै हुन्, प्रहरी प्रवक्ता सञ्जय राउतले भने । प्रहरी भन्छ, ‘अभियुक्त विश्वप्रकाश बास्तोला पक्राउ परेको युवा नै हो । तर, युवा भन्छन्, ‘म विश्वप्रकाश होइन हेमन्त बास्तोला हुँ ।’
‘प्रहरीको अपराध अनुसन्धान फाइलमा विश्वप्रकाश बास्तोला उल्लेख छ’, जिल्ला अदालत चितवनका नासु जयनारायण आचार्यले भने, ‘उनले अपराध स्वीकारेका छैनन् र आफ्नो नाम विश्वप्रकाश नभई हेमन्त भएको बताएका छन् ।’
नाम बाझिन आएपछि आरोपित युवकको नागरिकता, राहदानी, मतदाता नामावलीलगायतका प्रमाण पुग्ने सरकारी कागजहरु हेर्दा युवकको नाम हेमन्त नै भएको प्रमाणित भएको छ । नाम फरक परे पनि अभियुक्त सोही युवा हो होइन भनी किटान गर्न थप अनुसन्धान जरूरी देखिन्छ ।
प्रहरीले हत्या र ज्यान मार्ने अभियोगमा मंगलपुर–२ का २४ वर्षीय विश्वप्रकाश बास्तोलाको संलग्नता भन्दै खोजी गरिहेको थियो । बास्तोलालाई प्रहरीले गत पुस ३ गते पक्राउ गरी चितवन जिल्ला अदालतमा बुझाएको थियो । बास्तोलालाई कर्तव्य ज्यानअन्तर्गत भने जिल्ला अदालत चितवनले २५ हजार धरौटीमा छोड्ने आदेश गरेको छ ।
आरोपित युवा बास्तोलामथि २०६८ साल असोज १ गते मंगलपुर–८ का १७ वर्षीय विराज विकको हत्या अभियोग लागेको थियो । विराजलाई छुरा प्रहार गरी हत्या गरेको आरोपमा उनीसहित ११ जनाविरूद्ध जिल्ला अदालतमा प्रहरीले मुद्दा दायर गरेको थियो ।
कर्तव्य ज्यानका अन्य १० आरोपीलाई भने जिल्ला अदालत चितवनले पुर्पक्षको लागि जेल चलान गरेको छ । ‘यसबीचमा आफू काठमाडौँमा मोवाइल पसल सञ्चालन गरी आएको र गत चुनावमा भोट हाल्न घर आएको समयमा केही समय यहीँ रहँदा प्रहरीले पक्राउ गरेको बास्तोलाले बयानमा बताएका छन्, स्रोतले भन्यो ।
त्यसलगत्तै फरार रहेको भनिएका बास्तोलाले २०६९ असोज ८ गते भनपा १३ कल्याणपुरका अशोककुमार श्रेष्ठलाई छुरा प्रहार गरी ज्यान मार्ने उद्योग गरेको प्रहरीको आरोप छ ।
दुई ठूला मुद्दा खेपेका उनीविरूद्ध लागेको ज्यान मार्ने उद्योगको मुद्दा भने चलिरहेको छ । यस मुद्दाका लागि अदालतले केही दिन अघि ३ दिनको म्याद थप गरेको थियो ।
प्रहरीले पक्राउ गरेको अभियुक्त बास्तोलाले दुवै घटनामा आफ्नो संलग्नता नभएको बताएका छन् । कर्तव्य ज्यान मुद्दामा प्रहरीको मिसिल र अदालतको बयानको क्रममा नाम नै फरक परेपछि अदालतले हालका लागि धरौटीमा छाडेको हो ।
उनीविरूद्ध लागेको ज्यान मार्ने उद्योगको आरोपमा पनि प्रहरीले विश्वप्रकाश भनेको तर उनको वास्तविक परिचय भनी हेमन्त रहेकाले यस मुद्दा पनि प्रभावित हुने देखिन्छ । यस मुद्दाका पीडित पक्षले पनि हेमन्त बास्तोलाले घटना नगराएको प्रहरी समक्ष बताएको स्रोतले जनाएको छ ।