बालमैत्री गाविस घोषणा

नवलपरासी । मंगलबार प्रगतिनगरमा आयोजित विशेष समारोहमा संघीय मामिला तथा स्थानीय विकासमन्त्री विद्याधर मल्लिकले प्रगतिनगर गाविसले बालमैत्रीका सूचकाङ्कहरु पार गर्दै नेपालको पहिलो बालमैत्री गाविस भएको घोषणा गरेका छन् ।
प्रगतिनगर पहिलो बालमैत्री बन्न सफल भएकोमा मन्त्री मल्लिकले प्रगतिनगरवासीलाई बधाई दिएका छन् । प्रगतिनगरवासीले विकास र सुशासनमा देखाएको प्रतिवद्धताको मुलुकका अन्य गाविसले पनि अनुसरण गर्नुपर्ने बताएका छन् । उनले प्रगतिनगरलाई बालमैत्रीसँगै पूर्ण खोप र पूर्ण साक्षर गाविस घोषणा गरेका हुन्  ।
संघीय मामिला तथा स्थानीय विकास मन्त्रालयका सचिव शान्तबहादुर श्रेष्ठले प्रगतिनगर गाविस चाडै नै छिमेकी गाविसहरुले पनि अनुशरण गर्नुपर्ने बताए । बालमैत्रीका खम्बाका रुपमा रहेका बालबचाउ, बालबिकास, बालसंरक्षण र बालसहभागिता पूरा भएको र प्रत्येक क्षेत्रमा लागू गरिएको प्रगतिनगर गाविसका सचिव गोविन्दप्रसाद खनालले बताए । घोषणाको पूर्वसन्ध्यामा प्रगतिनगरका बाल क्लबहरुले बाजागाजासहित विभिन्न झाँकीसहित बजार परिक्रमा गरेका थिए ।