सत्रौँ वर्षमा पाइला टेक्दा…

अन‌ि यो पनि

चितवन पोष्ट दैनिक आजदेखि सत्रौँ वर्षमा पाइला टेक्दैछ । यस अभूतपूर्व खुसीको खबर साट्न पाउँदा हामीलाई गर्वानुभूति भएको छ । यस संघर्षमय यात्रामा हाम्रा दुःख–सुखमा साथ दिँदै आउनुभएका समस्त पाठक, लेखक, सहकर्मी, विज्ञापनदाता तथा शुभेच्छुकहरुमा हार्दिक आभार व्यक्त गर्दछौँ । मोफसलमा रहेर पत्रपत्रिकालाई निरन्तरता दिनु चुनौतीपूर्ण काम हो । अझ पेसागत इमानदारितामा रहेर एउटा प्रकाशन संस्थालाई नियमित रुपमा सञ्चालन गर्नु असाध्यै कठिन कार्य हो । यही दुस्साहससँग पौँठेजोरी खेल्दै हामी यहाँसम्म आइपुगेका छौँ । यस अनन्त यात्रामा पाइला टेक्दै गर्दा विगतका यावत् आरोह–अवरोहले पनि इतिहास बनेर पछ्याइरहेका छन् । चितवनवासीलाई सुसूचित बनाउने महान् यात्रामा यस पत्रिकाले पक्कै पनि मह¤वपूर्ण भूमिका खेलेको छ भन्नेमा हामी विश्वस्त छौँ ।
हाम्रा सम्पूर्ण सहकर्मी पत्रकारहरुको अथक मेहनत र पेसाप्रतिको बफादारिताले गर्दा हाम्रो सोह्र वर्षे यौवनकाल मह¤वपूर्ण र सफलतापूर्वक पार गर्न सफल भएका छौँ । आगामी दिनमा पनि अविरल रुपमा आफ्नो पेसा र मर्यादाप्रति निष्ठावान् भएर अगाडि बढ्ने प्रतिबद्धता व्यक्त गर्दछौँ । यस मह¤वपूर्ण अवसरमा यस पत्रिका निष्पक्ष, स्वतन्त्र र व्यावसायिक पत्रकारिताको मर्मअनुरुप आफ्नो यात्रामा लम्किरहेको छ भन्न पाउँदा हामी हर्षविभोर भएका छौँ । आगामी दिनमा पनि यही सिद्धान्त र आदर्शअनुसार अगाडि बढ्ने विश्वास व्यक्त गर्दछौँ । पत्रकारिता एउटा चुनौतीको पेसा हो । यस पेसामा अनगिन्ती समस्या छन् । हामीले पनि यस यात्रामा थुप्रै समस्या र पीडा भोग्दै आएका छौँ । दस वर्षे युद्धकाल, संकटकाल या राज्यपक्षबाट भएका विभिन्न सेन्सरसिपमा घटनाक्रमले निर्भीकतापूर्वक आफ्नो पेसामा समर्पित हुन नसकेका विगतका तीता अविस्मरणीय क्षणहरु हामीले व्यतीत गरिसकेका छौँ । विगतले वर्तमानलाई समेत आहत बनाउने घटनाहरु घटे पनि हाम्रो साहसिक यात्रा रोकिएको छैन । अविचलित रुपमा हामी सबैको साथ र सहयोगबाट अघि बढिरहेका छौँ । र, अघि बढिरहने प्रतिज्ञा गरेका छौँ ।
पत्रकारिता दुःखको पेसा हुँदाहुँदै पनि हामी समस्त आवाजविहीनहरुको आवाज भएर, विविध हिंसा तथा अन्यायको विरूद्ध न्याय एवम् मानवअधिकारको पक्षमा आवाज उठाएर शान्ति, समानता र समृद्ध नेपालका लागि आफ्नो आवाज मुखरित गरिरहेका छौँ । पेसागत इमानदारिता गर्दागर्दै पनि कहिलेकाहीँ केही प्राविधिक त्रुटिका कारण थुप्रै समस्या भोग्नु परेका दृष्टान्त हामीमाझ जुनझैँ छर्लङ्ग छन् । हामी हाम्रा पाठकहरुलाई सूचनाको हक प्रदान गर्नका लागि कटिबद्ध छौँ । सबैको सद्भाव र सहयोगबाट अझै परिष्कृत रुपमा अगाडि बढ्न प्रयासरत पनि छौँ । सुरूवातदेखि हामीसँगै यात्रामा सहयात्री भैदिनुभएकोमा हामी हाम्रा पाठक महोदय, ग्राहक महानुभाव, स्तम्भकार, विज्ञापनदाता तथा विभिन्न संघसंस्थाहरुप्रति कृतज्ञ छौँ । हाम्रा सम्पूर्ण शुभचिन्तकहरुबाट आफ्ना अमूल्य राय तथा सुझाव दिई आगामी यात्रामा अझै परिष्कृत रुपमा अगाडि बढ्न प्रेरणा र उत्साह प्रदान गर्न चितवन पोष्ट प्रकाशन प्रालि हार्दिक अनुरोध गर्दछ ।

प्रतिकृया

मुख्य समाचार

प्रतिनिधिसभा विघटनविरुद्धको रिटमाथि बहस पुनः सुरु

काठमाडौँ । सर्वोच्च अदालतमा प्रतिनिधिसभा विघटनविरुद्ध शेरबहादुर देउवासहितका सांसदले दायर गरेको रिटमाथि पुनः आजदेखि बहस सुरु भएको छ । सर्वोच्च...

धेरै पढिएको

अन्य समाचार

प्रतिकृया