क्षेत्रीय प्रतियोगिता सुरू

रत्ननगर । चितवनमा जारी छैटौं विद्यालय स्तरीय राष्ट्रपति रनिङ शिल्ड खेलकुद प्रतियोगिताअन्तर्गत क्षेत्र ४ र ५ मा क्षेत्रीय प्रतियोगता शुक्रबारबाट सुरू भएको छ । चितवन क्षेत्र ४ को शारदा उच्च मावि शारदानगरमा जिल्ला शिक्षा अधिकारी रमाकान्त शर्मा र क्षेत्र  ५ को माडी उच्च माविमा सोही विद्यालय व्यवस्थापन समितिका अध्यक्ष मुक्तिप्रसाद काफ्लेले प्रतियोगिताको उद्घाटन गर्नुभएको हो ।

क्षेत्र ४ मा सामुदायिक र संस्थागतसहित १८ वटा विद्यालयका तथा क्षेत्र ५ मा ११ वटा विद्यालयका छात्रछात्राहरुको सहभागिता रहेको जिल्ला खेलकुद विकास समिति चितवनका प्रवक्ता रामहरि सेढार्इंले जानकारी दिनुभयो । प्रतियोगितामा एथलेटिक्सअन्तर्गत दौड, सटफुट, हाइजम्प, लङजम्प, त्रिपलजम्प र भलिबल खेल भोलि शनिबारसम्म सञ्चालन हुने उहाँले जानकारी दिनुभयो ।
क्षेत्रीय स्तरमा भएका विभिन्न प्रतियोगिताबाट छनोट भएका खेलाडीहरुको अन्तिम प्रतियोगिता नारायणगढको क्याम्पाचौरमा हुने जिल्ला खेलकुद विकास समितिका सचिव रामजी ढकालले जानकारी दिनुभयो । यसअघि चितवनको क्षेत्र १ र २ बाट खेलाडीहरु छनोट भइसकेका छन् ।