डेङ्गुविरूद्ध विशेष सतर्कता

भरतपुर । चितवनमा एकै महिनामा ७९ जनामा डेङ्गु देखिएपछि महामारीको रूप लिन सक्ने भन्दै विशेष सतर्कता अपनाइएको छ ।
जिल्ला जनस्वास्थ्य कार्यालय चितवनको तथ्याङ्कअनुसार मङ्सिर महिनामा मात्र ७९ जनामा डेङ्गु देखिएको छ । गत आर्थिक वर्षको मङ्सिर महिनामा दुई जनामा मात्र डेङ्गु फेला परेको थियो ।
अहिलेसम्म चितवनमा ३२८ जनामा डेङ्गुको सङ्क्रमण भेटिएको जिल्ला जनस्वास्थ्य कार्यालयका भेक्टर कन्ट्रोल निरीक्षक राम केसीले जानकारी दिनुभयो ।
केसीका अनुसार साउन महिनामा सात, भदौमा २०, असोजमा ५२ र कात्तिकमा १७० जनामा डेङ्गु भेटिएको हो । अहिलेसम्म एक हजार ७७२ जनाको रगत परीक्षण गरिएकामा सो सङ्ख्यामा डेङ्गुको सङ्क्रमण भेटिएको हो ।
जाडो मौसम सुरू भएपछि डेङ्गुको सङ्क्रमण घट्दै जानुपर्नेमा अरू बढेपछि नियन्त्रणको उपाएका विषयमा छलफल भइरहेको जिल्ला जनस्वास्थ्य कार्यालयका वरिष्ठ प्रशासकीय अधिकृत केहरसिंह गोदारले जानकारी दिनुभयो । जनचेतना जगाउने, कीटनाशक झूल वितरण गर्ने काम भइरहेको उहाँले बताउनुभयो ।