सपनासँगै सहिदका मूर्ति पनि अलपत्र

-दिपेन्द्र अधिकारी
भरतपुर । देशमा जारी अस्थिर राजनीतिले सहिदका सपनाहरु अलपत्र भइरहँदा द्वन्द्वको समयमा सहिद भएकाहरुको सम्झनामा निर्माण गरिएको मूर्ति पनि यतिखेर अलपत्र छन् । भरतपुर १२ निवासी मूर्तिकार सूर्य मध्यरातले बनाएको सहिदका १५ वटा मूर्तिहरु अहिले अलपत्र अवस्थामा छन् ।
२०६९ साल जेठ २४ गते सहिद प्रतिष्ठान रसुवा शाखाले द्वन्द्वको समयमा वीरगति प्राप्त गरी सहिद भएका जिल्लाका १८ जनाको अर्धकदको मूर्ति बनाउन जिम्मा दिइयो । जिम्मेवारी बमोजिम रातदिन नभनी नियमित मूर्ति निर्माणमा लागेका मध्यरातलाई काम दिने प्रतिष्ठान रसुवा शाखा अहिले सम्पर्कमै नआएर धोका दिएको छ । तीन जनाको भने फोटो अभावमा मूर्ति नबनाइएको उनले बताए ।
‘घरमा तयार पारी राखिएका १५ जना सहिदका अर्धकदको मूर्ति हेरेर मलाई नै नरमाइलो महसुस हुन थाल्यो, मूर्तिकार मध्यरातले भने, ‘बनाइदेऊ भनेर जिम्मा दिने पनि अहिले सम्पर्कमा छैनन् ।’ ‘सहिदका सपनाहरु बिचल्लीमा पर्दा जति पीडाबोध हुन्छ तीनका सम्झनामा निर्माण गरिएको मूर्ति हेरेर मेरो मन त्यतिकै दुःखित हुन्छ’, उनले भने ।
कुल १२ लाख ५० हजारको बजेटमा उनले सवै १८ जना सहिदको मूर्ति बनाउने जिम्मा पाएका थिए । तत्कालीन समयमा कच्चा पदार्थ किन्नका लागि २ लाख ५० हजार पेस्की दिने र बाँकी रकम पछि भुक्तानी गर्ने सहमति भएपनि अहिले आफूलाई काम दिने निकाय सम्पर्कमा नआएको उनले बताए । पेस्कीस्वरूप जम्मा उनले जम्मा १ लाख ३९ हजार रूपैयाँ मात्र पाएका छन् । उनले तयार पारेको सहिदहरुको मूर्तिको भीडमा चितवनमा सहिद शारदा र समरको पनि अर्धकदको मूर्ति रहेको छ ।
‘१५ वटा मूर्ति बनाउँदाको मिहिनेतको पारिश्रमिक त कहाँ हो कहाँ, मूर्ति बनाउन आवश्यक कच्चा पदार्थ किन्ने पैसा पनि पूरा दिएनन्’, मध्यरातले भने । सहिद प्रतिष्ठान रसुवा शाखाले सहिद स्मारक बनाएर राख्ने भन्दै उनलाई यस्तो काम दिएको थियो । मूर्ति कुँदिएका सहिदको अनुहार नियाल्ने हो भने प्रायः किशोरकिशोरीहरु छन् । बनाइएका मध्ये ७ महिला र ८ पुरूषको मूर्ति रहेको छ ।
रूकुमका कामी बुढामगरको मूर्ति बनाउँदा एनेकपा माओवादी अध्यक्ष प्रचण्डले मूर्तिकार मध्यरातलाई  सम्मान गरेका थिए । त्यस्तै माओवादी नेता मोहन वैद्यले पनि उनलाई सम्मान गरिसकेका छन् । अलपत्र परेका सहिदका मूर्तिका सम्बन्धमा जिल्लामा पार्टीसम्बद्ध नेताहरुलाई बारम्बार जानकारी गराइपनि समस्या समाधान भएको उनले बताए ।
यही जिम्मेवारी पूरा गर्ने क्रममा नियमित काममा खटिएका मध्यरातको घाँटीको माथिल्लो भागमा नसाको समस्या पनि देखिएको छ । क्ले, डाइ र आरसीसी गर्दा समय र पैसाको धेरै नै खर्च हुने उनले बताए । उनको अुनसार एउटा मूर्ति तयार पार्न १ महिना र औसतमा ७५ हजार जति खर्च भएको छ ।
यसअघि उनले बनाएको एमाओवादीको पार्टी कार्यालय परिसरमा रहेको महिला जनमुक्ति सेनाको पूर्णकदको मूर्ति निकै लोकप्रिय छ । उनको मूर्ति बनाउने शैली विशेष रहेको भन्दै समालोचक डीआर पोखरेलले राज्यले नै यस्ता कलाकारको सम्मान गर्नुपर्ने बताए ।
उनले मूर्ति निर्माणका लागि सहयोगीका रुपमा लंकुका चित्रकुमार श्रेष्ठलाई साथमा लिएका छन् । मूर्तिकला पेसाबाटै परिवार धान्दै आएका मिहिनेती मध्यरातलाई सहिदका सालिक लिन नआउने भनी निकै गुनासो गरेका छन् । यसै पेशाबाट उनले भरतपुरमा घर र घडेरी जोड्न सफल भएका छन् । उमेरले ३३ वर्ष भएका मध्यरातले कवि, कलाकार, सहिदका विभिन्न अर्धकदका मूर्तिहरु बनाइसकेका छन् ।
उनले जिउँदै मानिसको पनि मूर्ति बनाउँदै आएका छन् । उनको घर परिसरमा भगवानका थुप्रै मूर्तिहरु देख्न पाइन्छ । त्यस्तै विभिन्न जनावरहरुको पनि मूर्ति बनाएका छन् ।
[divider]
फोटो क्याप्सनः अलपत्र अवस्थाका सहिदका मूर्तिहरु  ।