दश जनामा एचआइभी सङ्क्रमण

    भरतपुर । चितवनका विभिन्न क्षेत्रमा एक हजार ४६० जनाको रक्त परीक्षण गरिएकामा १० जनालाई एचआइभी सङ्क्रमण भएको पुष्टि भएको छ । जिल्ला जनस्वास्थ्य कार्यालय चितवनको अगुवाईमा सुरु भएको रगत परीक्षण, परामर्श र उपचार सेवामा परीक्षण गराएका १ हजार ४ सय ६० जनामध्ये दसजनामा संक्रमण देखिएको एचआइभीसम्बन्धी काम गर्दै आएको संस्था एएचएफका कार्यक्रम संयोजक कृष्णहरि सापकोटाले जानकारी दिनुभयो ।
उहाँका अनुसार अहिले पनि रक्त परीक्षणको काम जारी भएकाले सङ्ख्या अझ बढ्ने अनुमान गरिएको छ । यसरी गाउँगाउँमा रक्त परीक्षणमा सङ्क्रमण देखिनुले अझै मानिस खुल्न नचाहेको देखिन्छ ।
एचआइभी सङ्क्रमित खुलेर आउन नसकेको यो अवस्थामा उनीहरूलाई चेतना फैलाउँदै गाउँगाउँमा घुम्ती रक्त परीक्षण शिविर सञ्चालन गरिएको छ । विशेष प्रकारको किटको सहायताले एचआइभीको परीक्षण गरिएको आयोजकले बताएका छन् । जिल्ला जनस्वास्थ्य कार्यालय, भरतपुर अस्पताल र एएचएफ संस्थाको संयुक्त आयोजनामा यहाँ कार्यक्रम सञ्चालन गरिएको हो । यहाँको बछौली, शक्तिखोर, दारेचोक, मंगलपुरलगायत क्षेत्रमा गरिएको परीक्षणमा सङ्क्रमित फेला परेको हो ।
अहिले चितवनमा कुल ९६१ जनालाई एचआइभी सङ्क्रमण भएको र उनीहरूमध्ये ५४१ जनाले भरतपुर अस्पतालबाट एआर टी सेवा पाउँदै आएका छन् । उनीहरूलाई अब भरतपुर अस्पतालमा ल्याएर एआरटी सेवा उपलब्ध गराउने सापकोटाले बताउनुभयो । भरतपुर नगरपालिकासँगै बछौली, शक्तिखोर, मंगलपुर, मेघौली, दारेचोर, अयोध्यापुरी र गर्दी गाविसमा यो कार्यक्रम सञ्चालन गरिएको थियो ।
सो क्रममा पेट छाती र पाठेघरको स्वास्थ्य परीक्षणसँगै औषधिसमेत वितरण गरिएको सापकोटाले बताउनुभयो । जिल्ला एड्स समन्वय समिति चितवनले दिएको तथ्याङ्कअनुसार पछिल्लो छ वर्षको अन्तरालमा एड्सका कारण चितवनमा ६९ जनाको मृत्यु भएका छन् । ५० पुरुष र १६ जना महिलाको एड्सका कारण ज्यान गएको हो । यस्तै एक जना तेस्रोलिंगी र दुई बालबालिकाको एड्सकै कारण ज्यान गएको समितिका संयोजक रामहरि न्यौपानेले जानकारी दिनुभयो । उहाँले चितवनमा अहिले करिब दुई हजारको हाराहारीमा एचआइभी सङ्क्रमित रहेको बताउनुभयो । रासस