राष्ट्रपति रनिङको तयारी अन्तिम चरणमा

रत्ननगर । पुष ३ गते बुधबारदेखि चितवनमा हुने राष्ट्रपति रनिङ शिल्ड खेलकुद प्रतियोगिताको तयारी अन्तिम चरणमा पुगेको छ ।
राष्ट्रपति रनिङ शिल्ड व्यवस्थापन तथा निर्देशन समितिको आयोजनामा हुने प्रतियोगितामा चितवनका ५ वटै निर्वाचन क्षेत्रमा अन्तर माविस्तरीय खेलहरु हुने जिल्ला खेलकुद विकास समितिका सदस्य सचिव रामजी ढकालले जानकारी दिनुभयो । राष्ट्रपति रनिङ शिल्ड खेलकुद प्रतियोगिताअन्तर्गत तेक्वान्दो, उसु, एथलेक्टिस, भलिबल, सितेरियो कराते खेलहरु हुने ढकालले जानकारी दिनुभयो । प्रतियोगिताको लागि टिम दर्ता, मैदान व्यवस्थापन, स्थान छनोटलगायतका कामहरु अन्तिम चरणमा पुगेको र २ गते बेलुकासम्म सबै काम सकिने जिल्ला खेलकुद विकास समितिका अध्यक्ष एवम् आयोजक समितिका सदस्य उत्तम गुरूङले जानकारी दिनुभयो ।
जिल्ला शिक्षा समितिका अध्यक्ष संयोजक स्थानीय विकास अधिकारी तिलक पौडेलको अध्यक्षतामा हुने प्रतियोगितामा क्षेत्र १ को वीरेन्द्र आदर्श मावि, २ को पञ्चकन्या उच्च मावि, ३ को बालकुमारी उच्च मावि, ४ को शारदानगर उच्च मावि र ५ को माडी उच्च माविमा हुनेछ ।
प्रतियोगिता १ र २ नम्बर क्षेत्रमा पौष ३ र ४ गते तथा क्षेत्र ४ र ५ को ५ र ६ गते, त्यस्तै, क्षेत्र ३ को पुष ७ र ८ गते हुने आयोजकले बताएका छन् । सो क्षेत्रगत प्रतियोगितामा छनौट भएका समूहको अन्तिम प्रतियोगिता पौष ९ र १० गते क्याम्पाचौरमा हुने आयोजकले जानकारी दिएको छ ।
जिल्लाभरका सामुदायिक र संस्थागत विद्यालयका विद्यार्थीहरुको सहभागिता रहने सो प्रतियोगिताको कराते खेल पुष १६ र १७ गते भरतपुरको कर्भडहल, तेक्वान्दो खेल रत्ननगरको नेपाल उच्च माविमा पुष १९ र २० गते तथा उसु खेल पुष २० गते भरतपुर कर्भडहलमा हुने बताइएको छ ।