नेकपा–माओवादीको विस्तारित बैठक: पुराना सम्झौता खारेजीको घोषणा

काठमाडौँ । यसअघि राज्यपक्ष तथा राजनीतिक दलहरुसँग भएका पुराना सम्झौताहरु खारेज भएको नेकपा–माओवादीले घोषणा गरेको छ । एकीकृत माओवादीबाट विभक्त भई आन्दोलमा होमिएको मोहन वैद्य किरण नेतृत्वको नेकपा–माओवादीले पुराना सम्झौताहरु खारेज भएको घोषणा गरेको हो ।
गत आइतबारदेखि शुक्रबारसम्म चलेको माओवादीको केन्द्रीय कमिटि तथा सल्लाहकारहरुको विस्तारित बैठकले पुराना सम्झौता तथा सहमतिको औचित्य समाप्त भएको घोषणा गर्दै नयाँ सहमतिअनुसार अगाडि बढ्नुपर्ने निष्कर्ष निकालेको सोमबार राजधानीमा आयोजित पत्रकार सम्मेलनमा अध्यक्ष मोहन वैद्यले घोषणा गरे । पत्रकार सम्मेलनमा उनले २०६२ सालमा तत्कालीन माओवादी र संसदवादी राजनीतिक दलबीच भएको १२ बुँदे समझदारीदेखि २०६३ मंसिर ५ गते भएको विस्तृत शान्ति सम्झौतासमेत खारेज भएको घोषणा गरे ।
‘पहिले भएका सहमति सम्झौताहरु खारेज भइसके’, अध्यक्ष वैद्यले भने, ‘अब नयाँ सिराबाट सहमति गरेर अगाडि बढ्नुपर्छ ।’ अहिलेसम्म चलेको राजनीति पुराना सहमतिबाट चलेको भन्दै अब नयाँ सम्झौताअनुसार गोलमेच सम्मेलनबाट राजनीतिक निकास खोजिनुपर्ने उनले बताए ।
उनले पत्रकार सम्मेलनमा मंसिर ४ गते भएको संविधानसभाको निर्वाचन विथोल्ने क्रममा भएका घटनाहरुको समेत जिम्मेवारी लिएका छन् । माओवादीले एमाओवादी संविधानसभाबाट बाहिरिएर आन्दोलनमा आएमात्र उनीहरुसँग कार्यगत एकता हुन सक्ने बताएको छ । उनीहरुले कार्यगत एकता र सहकार्यका लागि निर्वाचनमा एमाओवादीबाट विजयी सभासदहरुले समेत राजिनामा दिनुपर्ने सर्तलाई अगाडि सारेको छ ।
मंसिर ४ गते भएको संविधानसभाको निर्वाचनमा तेस्रो स्थानमा तल झरेको एमाओवादीले माओवादीको सर्तलाई कसरी लिने हो त्यो भने हेर्न बाँकी छ । एमाओवादीले अहिलेसम्म निर्वाचनमा भएको धाँधलीको आयोग गठन गरी छानविन नगरेसम्म संविधानसभामा सहभागी नहुने र समानुपातिकतर्फका सभाससदहरुको नाम निर्वाचन आयोगमा नबुझाउने अडान लिँदै आएको छ ।