अझै भएन कारवाही काल्पनिक विद्यालयलाई

विधुर ढकाल
[divider]भरतपुर । विद्यालयका नाममा खोलिएका अमुक संस्थाहरुले विद्यार्थी तथा अभिभावकहरुलाई ठगिरहेका छन् । तर, तिनलाई कारवाही गर्नतर्फ सरोकारवाला निकाय भने तातेको देखिँदैन । शिक्षाका नाममा अवैध धन्दा गरेर व्यापार गर्नेहरु कारबाहीको दायरामा आउन सकेका छैनन् । यस्ता संस्था तथा व्यक्तिहरु खुलेआम विद्यालयको बोर्ड झुण्ड्याएर अभिभावक तथा विद्यार्थीहरु ठग्ने काम गरिरहेका छन् । तर, जिल्ला शिक्षा कार्यालय र जिल्ला प्रशासन कार्यालयसमेत कारबाही

गर्नभन्दा पनि सार्वजनिक सूचना प्रकाशित गर्दै झारा टार्ने काममा मात्र लागेको देखिन्छ ।
जिल्लाका विभिन्न स्थानमा अवैध रुपमा विद्यालयको नाममा नक्कली संस्था चलाएर विद्यार्थीहरुलाई ठगी गर्नेहरु अघिल्ला वर्षदेखि नै सक्रिय रहे पनि अहिलेसम्म कारबाही हुन नसक्दा निर्वाध रुपमा उनीहरुले विद्यार्थी र अभिभावकहरुलाई ठग्दै आएका छन् । यसरी जिल्लामा हाल चारवटा संस्थाहरु विना दर्ता विद्यालयको नाममा चलिरहेका छन् । उनीहरुले पटकपटक जिल्ला शिक्षा कार्यालयका सूचनालाई बेवास्ता गर्दासमेत कारवाही गर्नतर्फ कार्यालय लागेको देखिँदैन ।

यसरी अनुमति विना नै विद्यालयका नाममा पूर्वी चितवनको चैनपुरमा दुईवटा संस्थाहरु सञ्चालनमा छन् । चैनपुरमा स्थानीय विष्णुप्रसाद सिलवालले आदर्श ई. बोर्डिङ स्कुल र ढलक लामाले बुद्धशान्ति ई. स्कुलका नाममा अवैध संस्था सञ्चालन गरेका छन्  । त्यस्तै, सोमप्रसाद पाण्डेले पिप्लेमा दीपज्योति ई. स्कुलको नाममा र बमबहादुर थापामगरले दाहाखानी गर्दासमा चतुर्मुखी ई. स्कुलको नाममा अवैध विद्यालय सञ्चालनमा छन् ।

अघिल्लो वर्षसमेत जिल्ला शिक्षा कार्यालयलाई यी विद्यालयहरु अवैध रुपमा चलेको जानकारी थियो । यसपटक पनि कारबाही गर्न कार्यालय असफल देखिएको छ । चालु शैक्षिकसत्रको नै उत्तरार्धमा आइपुग्दासमेत विद्यालयका नाममा अवैध धन्दा गर्नेलाई न त जिल्ला शिक्षा कार्यालयले नै कारबाहीको दायरामा ल्याउन सकेको छ, न त प्रशासनले नै कारबाहीमा अग्रसरता देखाएको छ ।

गत शैक्षिकसत्रको माघ तेस्रो साता जिल्ला शिक्षा कार्यालय चितवनले जिल्ला प्रशासन कार्यालयलाई पत्राचार गर्दै विद्यालयका नाममा सञ्चालन भइरहेका संस्थाहरुलाई कारबाही गर्न आग्रह गरेको थियो । जिल्ला शिक्षा समितिको गत माग १९ गते बसेको जिल्ला शिक्षा समितिको बैठकले जिल्ला प्रशासनलाई कारबाही गर्न आग्रह गर्दै पत्र लेखेको थियो । त्यसपछि २०६९ साल चैत्र २९ र २०७० साल माद्र २८ गते कार्यालयले दुई पटक सार्वजनिक सूचना जारी गरी काल्पनिक विद्यालय बन्द गर्न ताकेता गरेको थियो ।

उक्त सूचनाको पनि ती नाममात्रका विद्यालयले बेवास्ता गर्दै कक्षालाई निरन्तरता दिए । अहिले फेरि कार्यालयले शैक्षिकसत्र सकिन तीन महिना बाँकी छँदा फेरि सार्वजनिक सूचना जारी गरेको छ । सूचनामा विद्यार्थी तथा अभिभावकलाई विना दर्ता चलेका काल्पनिक विद्यालयमा विद्यार्थी भर्ना गरेको भए नजिकको विद्यालयमा भर्ना गराउन आग्रह गरेको छ । शैक्षिकसत्र सकिने बेलामा कुनै पनि विद्यालयमा त्यसरी भर्ना लिन मुस्किल पर्ने अवस्थामा विद्यार्थी तथा अभिभावकलाई मर्कामा पारेर विद्यार्थी सार भन्ने कार्यालयले अमुक विद्यालय तथा तिनका सञ्चालकलाई कारबाही गर्न नसक्नु विडम्बना हो ।

अघिल्लो वर्ष पनि जिल्ला प्रशासनलाई कारबाही गर्न आग्रह गरिएकामध्ये चार विद्यालय यिनै हुन् । त्यस्तै, कारबाहीको डरले गर्दासको त्रियक ई. बोर्डिङ स्कुल, चैनपुरको हिमालय एकेडेमी र पिप्लेको सांग्रिला ई. बोर्डिङ भने यो शैक्षिक सत्रमा बन्द भएका छन् ।

शिक्षा नियमावलीमा विद्यालयमा दर्ता नै नभएका विद्यालयहरुलाई कारबाही गर्ने प्रावधान नभएकोले यिनलाई कारबाहीको दायरामा ल्याउन कठिन भएको प्रतिक्रिया गत वर्ष जिल्ला शिक्षा अधिकारी रमाकान्त शर्माले दिँदै जिल्ला प्रशासन कार्यालयलाई पत्र पठाउनु परेको जानकारी दिएका थिए । गत वर्ष शिक्षा कार्यालयले पत्र पठाउने बेलासमेत चितवनमा नै रहनुभएका गेलालले यदि त्यस्तो भए जिल्ला शिक्षा कार्यालयले नै कारबाही गर्नुपर्ने र सुरक्षा आफूहरुले दिने बताए पनि अहिले सम्म ती विद्यालयलाई कारवाही गर्न सकेको छैन् ।

गत भदौमा चितवन पोष्टलाई जिल्ला शिक्षा अधिकारी शर्माले सञ्चालकहरुलाई पत्र काटेर त्यस्ता नाममा चलेका विद्यालय बन्द गर्न भनिएको र बन्द नगरिए कार्यालय आफँैले बन्द गराउने बताएका थिए । तर, अहिलेसम्म कारवाही हुन सकेको छैन । कार्यालयले फेरि पनि तीन महिना अगाडिको जस्तै व्यहोरा उल्लेख भएको सूचना शुक्रबार जारी गरेको छ ।

जिल्ला शिक्षा कार्यालयले पटकपटक सूचना जारी गर्ने तर कारवाही नगर्ने तथा अवैधरुमा काल्पनिक विद्यालय सञ्चालन गर्नेहरु भने खुलेआम विद्यार्थी तथा अभिभावक ठग्दै जानुले प्रशासनिक असक्षमता प्रदर्शन गरेको छ ।