खेलाडीको उचित सम्मान

सरकारले खेलकुदमा कीर्तिमान कायम गरेका खेलाडीलाई खेलकुद इतिहासमै व्यक्तिगत रुपमा ठूलो राशिको पुरस्कार दिने निर्णय गरेको छ । यस मह¤वपूर्ण निर्णयले सम्पूर्ण खेलाडीको मनोबल बढाउन सहयोग पु¥याएको छ । मन्त्रिपरिषद्को बैठकले तेक्वान्दोका दीपक विष्ट र एथलेटिक्सका भेट्रान बैकुण्ठ मानन्धरलाई जनही २५ लाख रूपैयाँ दिने निर्णय गरेर खेलकुदमा सकारात्मक सन्देश दिएको छ । राष्ट्रिय खेलकुद परिषद्ले दक्षिण एसियाली खेलकुदमा तीन वा सोभन्दा बढी स्वर्णपदक जित्ने खेलाडीलाई आवास सुविधास्वरुप २५ लाख रूपैयाँ उपलब्ध गराउन युवा तथा खेलकुद मन्त्रालयमार्फत सरकारलाई सिफारिस गरेको थियो । तेक्वान्दोतर्फ विष्टले दक्षिण एसियाली खेलकुदमा चार स्वर्णपदक जितेर कीर्तिमान कायम गरेका थिए । उनले सन् १९९९ मा काठमाडौँमा सम्पन्न आठौँ साफ, सन् २००४ मा पाकिस्तानको इस्लामावादमा सम्पन्न नवौँ साफ, सन् २००६ मा भएको श्रीलंकाको दसौँ साग र सन् २०१० मा बंगलादेशमा सम्पन्न एघारौँ सागमा लगातार स्वर्णपदक जितेर कीर्तिमान बनाएका थिए ।
म्याराथनतर्फ तीन स्वर्ण जितेका मानन्धरको २ घन्टा १५ मिनेटको कीर्तिमान दक्षिण एसियामा कसैले तोड्न सकेको छैन । उनले पनि काठमाडौँमा सन् १९८३ मा सम्पन्न पहिलो साफ, १९८५ मा बंगलादेशको ढाकामा सम्पन्न दोस्रो साफ तथा १९८७ मा भारतको कोलकातामा सम्पन्न तेस्रो साफमा लगातार तीन स्वर्ण जितेका थिए । सरकारको यो निर्णयले खेलाडीको साँच्चै कदर गरेको छ । यस्ता सम्मानको अर्थ राष्ट्रको प्रतिनिधित्व गरेर खेल्ने खेलाडीको मनोबल उच्च हुनुका साथै भावीपुस्तालाई खेलकुदमा लाग्न प्रेरित गर्नु पनि हो । राष्ट्रिय खेलकुद परिषद्ले आवास सुविधाको लागि सरकारलाई गरेको सकारात्मक प्रस्ताव प्रशंसायोग्य छ । उक्त निर्णयबाट खेलकुदमा समर्पित हुने खेलाडीलाई उत्साह प्रदान गरेको छ । केही वर्षयता नेपालले खेलकुदको क्षेत्रमा अविश्वसनीय उपलब्धि हासिल गरेको छ । राष्ट्रको शान र नाम उँचो राख्नका लागि खेल्ने खेलाडीलाई सरकारले उचित सम्मान गर्न थालेको आभास पनि मिलेको छ ।
भर्खरै मात्र क्रिकेट विश्वकप छनोटका लागि यूएईमा भएको टी–२० च्याम्पियनसिपमा नेपालले तेस्रो स्थानसहित विश्वकप खेल्ने सपना साकार बनाएको थियो । क्यानको सिफारिसमा खेलकुद मन्त्रालयमार्फत सरकारले नेपाली क्रिकेटरलाई जनही १० लाखसहित सम्मान गरेर क्रिकेटप्रेमी खेलाडीलाई हौसला प्रदान गरेको थियो । जीवनभर खेलमा समर्पित हुनेलाई सरकारले जीवनवृत्तिका लागि विशेष कोषको व्यवस्था गरेर खेलाडीको मनोबल उच्च राख्न सहयोग गर्नुपर्छ । खेलाडी राष्ट्रका अमूल्य सम्पत्ति र सम्पदा हुन् भन्ने तथ्य बुझेर उनीहरुलाई अवसरसँगै राज्यले उचित राहत प्रदान गर्नुपर्छ । राष्ट्रका लागि समर्पित भएर खेल्ने कतिपय होनहार खेलाडीहरुलाई विगतमा राज्यले सहयोग नगर्दा खेल क्षेत्रबाटै पलायन भएका छन् । हरेक खेलाडीलाई अवसरका साथै उचित सम्मान गर्न सके अपेक्षाअनुरुपको सफलता हासिल गर्न सकिन्छ । सरकारले खेलकुद क्षेत्रमा गरेको लगानीले राष्ट्रकै गौरव र गरिमा बढाउँछ । सरकारले खेलाडीलाई खेलकुदमा लाग्न प्रेरित गर्दै यस्ता सम्मान निरन्तर रुपमा अघि बढाउनु पर्ने देखिन्छ ।