पर्यटक भित्र्याउन व्यवसायीहरु जुट्दै

• चितवन र पोखरामा महोत्सव [divider]

-होमनाथ सापकोटा
सौराहा । अंग्रेजी नयाँ वर्षलाई केन्द्रित गरी चितवन र पोखरामा दुई ठूला महोत्सव हुँदैछन् । नयाँ वर्षमा विशेष गरी विदेशी पाहुनालाई मध्यनजर गरी पर्यटन व्यवसायीहरुले हरेक वर्ष महोत्सव गर्दै आइरहेका छन् ।
चितवनमा पुष ११ देखि १५ गतेसम्म हात्ती महोत्सव र पोखरामा पुष १३ देखि १७ गतेसम्म पोखरा सडक महोत्सव हुँदैछ । अंगेजी नयाँ वर्षमा प्रायः गरी विदेशी पर्यटकहरु बसाइँ छोट्याएर स्वदेश फर्कने भएकाले उनीहरुको बसाइँ लम्ब्याउन चितवन र पोखरामा व्यवसायीहरुले महोत्सव गर्ने गरेका छन् । नेपाल आउने हरेक पर्यटकहरु चितवनको पर्यटकीय नगरी सौराहा र नेपालकै दोस्रो पर्यटकीय स्थल पोखरा तथा धार्मिक पर्यटकीय स्थलको रुपमा विकास भइरहेको लुम्बिनीको भ्रमण गरेर फर्कने गरेका छन् । चितवन, पोखरा र लुम्बिनीका व्यवसायीहरुले महोत्सव गरेर पर्यटकको ओहोरदोहोरको लागि त्रिकोणात्मक सम्बन्ध स्थापित गराउने योजनामा समेत रहेका छन् ।
नयाँ वर्षमा पाहुनाको बसाइँ लम्ब्याउन पोखरा आएका पर्यटकलाई चितवन र लुम्बिनी भ्रमण गराउने योजना रहेको पोखरा सडक महोत्सवका सहसंयोजक तथा पोखरा पर्यटन परिषदका अध्यक्ष भीमसेन भुजेलले बताउनुभयो । ‘मुलुकको अर्थतन्त्रको मेरूदण्डको रूपमा स्थापित पर्यटन व्यवसायको व्यवस्थित विकास गर्न व्यवसायीहरुले गर्ने पर्यटकीय महोत्सवमा सहकार्य गरेर पर्यटकको बसाइँ लम्ब्याउन आवश्यक छ’ उहाँले भन्नुभयो, ‘त्यसको चितवन आएका पर्यटकलाई पोखरा र लुम्बिनीलगायतका पर्यटकीय स्थलको भ्रमण गराउन जरूरी रहेको छ ।
चितवनमा हात्ती महोत्सव चलिरहेका बेला पोखरामा पुष १३ देखि १५ सम्म पोखरा सडक महोत्सव हुँदैछ । रेष्टुरेण्ट एण्ड बार एसोसियसन (रेवान) पोखराको आयोजनामा हुने महोत्सवको मुख्य नारा सडकमै खाऊँ, सडकमै बाँचौं र सडकमै रमाऊँ भन्ने रहेको छ । पोखरा सडक महोत्सवकोे बारेमा बिहीबार चितवनको सौराहामा पत्रकार सम्मेलनको आयोजना गरी जानकारी गराइएको हो । यस वर्ष पोखरा सडक महोत्सवलाई खाना, संगीत र संस्कृतिलाई जोड दिइएको रेवान पोखराका अध्यक्ष गोपीबहादुर भट्टराईले बताउनुभयो ।
महोत्सवले स्थानीय स्तरका खानाको प्रर्वद्धनसँगै विभिन्न जातजातिका संस्कृतिलाई समेत समेट्ने भएकाले तिनीहरुको पनि संरक्षणमा टेवा पुग्ने अध्यक्ष भट्टराईले बताउनुभयो ।  अंग्रेजी नयाँ वर्षमा पाहुनालाई आकर्षित गर्न आयोजना गरिएको सो महोत्सवमा स्वदेशी तथा विदेशी पर्यटकले रूचाउने खानाहरु सडकमै उपलब्ध गराइने १५ औं पोखरा सडक महोत्सव मूल समारोह समितिका संयोजक बलराम पहारीले जानकारी दिनुभयो । पोखराको पर्यटकीय स्थल लेकसाइडमा हुने महोत्सवमा दर्जनौं खानाका स्टल लगायत सडकमै विभिन्न सांस्कृतिक कार्यक्रम, रोचक खेलकुद प्रतियोगिता, पर्यटन उद्योगलाई समेटेर तयार पारिएका साहसिक र मनोरञ्जनात्मक वृत्तचित्र, फोटो प्रदर्शनी महोत्सवको प्रमुख आकर्षण रहेको संयोजक पहारीले जानकारी दिनुभयो ।
त्यतिमात्र होइन महोत्सवमा पत्रकारहरुबीच दौड प्रतियोगिता, साइकल दौड, रेवानका कर्मचारीहरुबीच दौड, डुंगा दौडलगायतका कार्यक्रमहरु समावेश गरिएको संयोजक पहारीले बताउनुभयो । सडकमहोत्सवलाई लक्षित गरी होटल, रेष्टुरेण्ट, यातायात तथा साहासिक उडान प्याराग्लाइडिङ, अल्ट्रालाइट र जिप फ्लायरका विशेष छुटको व्यवस्था गरिएको संयोजक पहारीले जानकारी दिनुभयो ।
सडक महोत्सवमा करिब १० करोड रूपैयाँ बराबरको आर्थिक कारोबार हुने र ५ लाख स्वदेशी तथा विदेशी पर्यटकले महोत्सवको अवलोकन गर्ने आयोजकले बताएका छन ।