केन्द्रका बालबालिकालाई कपडा

रत्ननगर । वैदेशिक रोजगारको सिलसिलामा इजरायमा रहनु भएकी पारु लोहारले गामवेसीको चेपाङ संरक्षण केन्द्रमा आश्रित चेपाङ बालबालिकालाई जाडोमा लगाउने न्यानो कपडा सहयोग गर्नुभएको छ । झापा निवासी लोहारले पार्सल गरेर हुलाकमार्फत चेपाङ बालबालिकालाई कपडा पठाइ दिनुभएको केन्द्रका अध्यक्ष केपिकिरण शर्माले जानकारी दिनुभयो ।
सञ्चार माध्यममार्फत संरक्षण केन्द्रको बारेमा जानकारी पाएपछि लोहारले विगतदेखि नै सहयोग गर्दै आउनु भएको छ । यसअघि खाद्यान्न खरिदको लागि आर्थिक सहयोग गर्नुभएकी लोहारले अहिले जाडोमा लगाउने कपडा सहयोग गर्नुभएको हो ।
पार्सल गरेर हुलाकमार्फत पठाएको कपडा बिहीबार केन्द्रमा आइपुगेको अध्यक्ष शर्माले जानकारी दिनुभयो । सहयोग जुटाएर चेपाङ बालबालिकालाई आवासीय सुविधासहित अध्ययन गराउँदै आएको केन्द्रमा अन्य सहयोग जुटेको भएपनि अहिले खाद्यान्न अभाव भएको छ ।
केन्द्रमा चितवन र मकवानपुरका ५२ जना चेपाङ बालबालिका आश्रित छन् ।