राष्ट्रिय भलिबल प्रतियोगिता हुने

नवलपरासी । आगामी पौष २७ गतेदेखि नवलपरासी र पोखरामा राष्ट्रिय भलिबल प्रतियोगिता संचालन हुने भएको छ । नेपाल भलिबल संघको आयोजनामा हुने प्रतियोगिताअन्तर्गत पुरूषतर्फका खेलहरु पौष ३० गतेदेखि नवलपरासीमा सञ्चालन हुनेछन् भने महिलातर्फका खेलहरु पौष २७ गतेदेखि पोखरामा हँुदैछ ।
प्रतियोगिताबारे जानकारी दिन राष्ट्रिय खेलकुद परिषदले काठमाडांैमा पत्रकार सम्मेलनको आयोजना गरी पौष १५ देखि माघ १५ गतेसम्म सबै खेलका राष्ट्रिय प्रतियोगिता आयोजना गर्न सम्बन्धित खेलकुद संघहरुलाई निर्देशन दिएको छ ।
प्रतियोगितामा पुरूषतर्फ ५ विकास क्षेत्रका तीन विभागीय टोलीहरु क्रमशः आर्मी, पुलिस र सशस्त्र तथा विश्वविद्यालयका गरी ९ टोली सहभागी हुने छन् भने महिलातर्फ आर्मी क्लबबाहेक ८ टोली सहभागी हुने पत्रकार सम्मेलनमा सहभागी नवलपरासी भलिबल संघका अध्यक्ष दिनेश श्रेष्ठले जानकारी दिए ।
प्रतियोगिता सञ्चालन गर्न २८ लाखभन्दा बढी खर्च लाग्ने आयोजकको अनुमान छ । राष्ट्रिय खेलकुद परिषदले लुम्बिनी च्याम्पियनसिप २०७०, शान्तिका लागि खेलकुद भन्ने नाराका साथ एक महिनाभर विभिन्न खेलकुद प्रतियोगिताहरु सञ्चालन गर्ने निर्देशन दिइसकेको छ । स्थानीयस्तरमै आर्थिक संकलन गरी हरेकवर्ष प्रतियोगिता सञ्चालन गर्दै आएको नवलपरासी भलिबल संघलाई यो वर्ष भने खेलकुद परिषदबाटै प्रतियोगिता सम्पन्न गर्ने जिम्मेवारी दिएको संघका जिल्ला अध्यक्ष दिनेश श्रेष्ठले बताए ।