तनहुँमा नेपालकै ठूलो भैँसी फर्म

तनहुँ । पछिल्ला वर्षमा भैँसीको सङ्ख्या घट्दै गएकोमा तनहुँको ढोरफिर्दीमा भने नेपालमा नै ठूलो भैँसी फर्म सञ्चालनमा आएको छ ।
शुद्ध भैँसीको दूध उत्पादन गर्ने उद्देश्यले तनहुँको ढोरफिर्दी–७ सुन्दरेमा भैँसी फर्म सञ्चालन गरिएको हो । ढोरतालबेसी एग्रिकल्चर प्रालि नामको संस्था दर्ता गरेर फर्म सञ्चालनमा ल्याइएको हो । फर्ममा अहिले करिब ६२ वटा भैँसी रहेका छन् ।
फर्मबाट अहिले करिब दैनिक १५० लिटर दूध उत्पादन हुने गरेको फर्मका सञ्चालकमध्येका एक विशाल केसीले बताउनुभयो । चार जना युवाको लगानीमा फर्म सञ्चालन गरिएको जानकारी केसीले दिनुभयो ।
उक्त फर्मबाट उत्पादित दूध पोखराको रामबजारमा गाउँले डेरी स्थापना गरेर बिक्री गर्ने गरेको केसीले बताउनुभयो । उत्पादकदेखि उपभोक्तासम्म किसानकै सहभागितामा गुणस्तरीय दूध पु¥याउने उद्देश्यले आफैँले डेरी स्थापना गरेर दूध बिक्री गर्ने गरिएको उहाँले बताउनुभयो ।
केही वर्ष अघिसम्म व्यावसायिक गाईपालन गर्नुभएको केसीले गाईको भन्दा भैँसीको दूधको माग उच्च रहेकाले भैँसी फर्म सञ्चालनमा ल्याएको बताउनुभयो ।
सो फर्मबाट उत्पादित दूध पोखरामा प्रतिलिटर रु ९० मा बिक्री गर्ने गरेको केसीले बताउनुभयो । उहाँले भैँसी फर्मको अलवा करिब १०० भन्दा बढी जग्गामा भैँसीका लागि घाँसखेती समेत गरेको बताउनुभयो ।
भैँसीलाई तराईबाट आयात गरेको पराल र दानाभन्दा घाँस खुवाएर दूधको उत्पादन वृद्धि गर्न सकिन्छ भन्ने देखाउनका लागि पनि आफूहरूले खेतीयोग्य जमिनमा घाँस खेती गरेको उहाँले बताउनुभयो । केसीले सञ्चालनमा ल्याएको फर्म नेपालमा नै ठूलो भएको पशुसेवा कार्यालय तनहुँका पशु चिकित्सक बाबुराम जम्मरकट्टेलले बताउनुभयो । नेपालमा गाईको ठूलाठूला फर्महरू भए पनि भैँसीको यति ठूलो फर्म नभएको उहाँको दाबी छ । रासस