चेपाङ संरक्षण केन्द्रमा खाद्यान्न अभाव

रत्ननगर । मागेर चेपाङ बालबालिकालाई आवासीय सुविधासहित अध्ययन गराइरहेको गामवेसीको चेपाङ संरक्षण केन्द्रमा खाद्यान्न अभाव भएको छ । दैनिक सहयोग संकलन गरेर चेपाङ बालबालिकालाई आवासीय सुविधासहित अध्ययन गराइरहेको केन्द्रमा अहिले चरम खाद्यान्न अभाव भएको केन्द्रका अध्यक्ष केपिकिरण शर्माले जानकारी दिनुभयो ।
केन्द्रमा आश्रित ५२ जना बालबालिकाका लागि दैनिक ३० किलो चामल, १० किलो आलु, १० किलो हरियो तरकारी, १ लिटर तेल लगायत नुन र मसला आवश्यक पर्ने भएपनि प्रयाप्त सहयोग नजुटेका कारण अहिले दैनिक गुजारा चलाउन मुस्किल परेको अध्यक्ष शर्माले बताउनुभयो । सहयोग गर्ने दाता भेटिए चेपाङ उत्थानको अभियानमा टेवा पुग्ने पनि उहाँले बताउनुभयो । ‘भएको सबै खाद्यान्न सकियो’ उहाँले भन्नुभयो, ‘अब बोरा बोकेर बजार ढुल्नुको विकल्प छैन । उहाँले छिटफुट सहयोग आइरहेको भएपनि त्यो प्रयाप्त नभएको बताउनुभयो ।
‘बालबालिकाको संख्या धेरै छ’, उहाँले भन्नुभयो, ‘सानो परिमाणको खाद्यान्नले धान्न मुस्किल भयो । केन्द्रमा चितवन र मकवानपुरका ८ जना अपाङगसहित ५२ जना चेपाङ बालबालिकाले आवासीय सुविधासहित अध्ययन गरिरहेका छन् । केन्द्रमा खाद्यान्न अभाव भएको थाहा पाएपछि भरतपुरको महेन्द्र ट्याक्टरका आधिकारिक विक्रेताको रुपमा पसल सञ्चालन गरिरहेका पुरुषोत्तम अर्याल र उनकी पत्नी ससी अर्यालले खाद्यान्न सहयोग गर्नुभएको छ । अर्याल दम्पतीले मंगलबार संरक्षण केन्द्रमा पुगेर ५ बोरा चामल सहयोग गर्नुभएको हो ।