चितवनलाई टुक्रन नदिने प्रतिबद्धता

भरतपुर । एमाले चितवन क्षेत्र ३ का विजयी उम्मेदवार कृष्णभक्त पोखरेलले कानुनको विद्यार्थी र कानुन व्यवसायी भएको कारणले आफू विजयी भएको बताउनु भएको छ । शुक्रबार भरतपुरमा चितवन बार एशोसिएसनले सम्मान एवम् बधाई कार्यक्रममा बोल्दै उहाँले कानुनको विद्यार्थी भएकै कारण संविधान बनाउन भनेर जनताले भोट दिएको बताउनु भएको हो ।
उहाँले पहिलो संविधानसभाको निर्वाचनमा पार्टीलाई आएको ८ हजार भोट आए पनि अहिले आफू कानुन व्यवसायीको माया र ममताले गर्दा त्यसको दोब्वर ल्याएर विजयी भएको बताउनुभयो । कार्यक्रममा उहाँले चितवनलाई   संघीय राजधानी बनाउन नसके पनि टुक्रन नदिने प्रतिबद्धता जनाउनुभयो । त्यस्तै सो कार्यक्रममा प्रमुखअतिथि रहनुभएका जिल्ला अदालतका प्रमुख न्यायाधीश विनोदमोहन आचार्यले छिटोभन्दा छिटो संविधान बनाउने कुरामा कुनै मूल्य नचुकाउनेमा आफू आशावादी रहेको बताउनुभयो ।
उहाँले संविधान बनाउने कुरामा दलीय ह्वीप होला तर कानुन विद्यार्थीको नाताले छुट्टै पहिचान दिनेमा आशा रहेको बताउनुभयो । चितवन बार एसोसियसनका अध्यक्ष राजकुमार श्रेष्ठको अध्यक्षतामा भएको कार्यक्रममा न्यायाधीश अनन्तराम डम्रे्रे, भीमलाल बेलवासे, एकनारायण लम्साल तथा चितवन बार एशोसिएसनका सदस्यहरुले शुभकामना दिनुभएको थियो ।