तरकारी व्यवसायीलाई मूल्यसूची राख्न निर्देशन

नारायणगढ । जिल्ला प्रशासन कार्यालयका खाद्य निरीक्षकसहितको खाद्य अनुगमन टोलीले जिल्ला फलफूल तथा तरकारी व्यवसायी संघलाई पसलहरुमा मूल्यसूची राखी व्यवसाय मर्यादित गराउन निर्देशन दिएको छ । कार्यालयले मंगलबार गरेको फलफूल पसल अनुगमनका क्रममा मूल्यसूची नराखिएको तथा केही पसलहरुले व्यवसाय दर्ता प्रमाणपत्र नलिएको पाइएपछि टोलीले संघका पदाधिकारीहरुलाई यस्तो निर्देशन दिएको हो ।
जिल्ला प्रशासन कार्यालय, बजार संरक्षण अधिकृतको कार्यालय घरेलु साना उद्योग कार्यालय, भरतपुर नगरपालिका, उपभोक्ता अधिकार संरक्षण मञ्च तथा पत्रकारहरुका प्रतिनिधिहरुले गरेको बजार अनुगमनका क्रममा कुनै पनि फलफूल तथा तरकारी पसलहरुले मूल्य सूची नराखेको फेला पारेको हो ।
टोलीले नारायणगढको कृषिउपज बजारका पसलहरुमा अनुगमन गरेको थियो । अनुगमन गर्दा केही पसलहरुमा नापतौलका औजार नभएको र केहीमा व्यवस्थित नभएको जनाउँदै खाद्य निरीक्षक नवीन देउजाले व्यवसायलाई व्यवस्थित नगर्न निर्देशन दिएको बताए ।
अनुगमन टोलीले व्यवसायीलाई मूल्यसूची राखी मूल्यलाई अद्यावधिक राख्न निर्देशन दिएको हो । अनुगमन टोलीसँग फलफूल व्यवसायीसंघका पदाधिकारीले व्यवसाय मर्यादित गर्दै लाने बताएका छन् । संघले प्रत्येक व्यवसायीलाई मूल्यसूची राख्नको लागि आग्रह गर्ने संघका उपाध्यक्ष थिरप्रसाद धितालले बताए । व्यवसायीहरुलाई व्यवसाय दर्ता गरी सञ्चालन गर्न समेत पहल गर्ने उनले बताए ।
हालसम्म चितवनमा फलफूल तथा तरकारी व्यवसायीहरुले मूल्यसूची राखेका थिएनन् । कतिपय व्यवसायहरु अझै पनि दर्ता नगरी चल्दै आएका छन् ।
यसैबीच व्यवसायीहरुले नगरपालिकाले फोहोर व्यवस्थापन गर्न ध्यान नदिएको गुनासो गरेका छन् । अनुगमन टोलीले बजारमा फोहोर थुप्रिएको र व्यवस्थापन किन नगरेको भन्ने प्रश्न गर्दा व्यवसायीहरुले नगरपालिकाले फोहोर व्यवस्थापन शूल्क लिएपनि फोहोर व्यवस्थापनका लागि चासो नदिएको आरोप लगाए ।
कृषि बजार अधिक फोहर निस्कने बजार भए पनि त्यसलाई व्यवस्थित गर्न नगरपालिकाले आवश्यक पहल गर्न सकेको छैन् । नगरपालिकाले फोहोर उठाउन गाडी ल्याए पनि त्यो प्रयाप्त नभएको उनीहरुले बताए ।