भरतपुर । राष्ट्रिय प्रजातन्त्र पार्टीका महामन्त्री विक्रम पाण्डेले संविधान जारी नभएसम्म राष्ट्रपति र उपराष्ट्रपति कायमै रहनुपर्ने बताउनुभएको छ ।
भरतपुरमा मंगलबार बिहान सञ्चारकर्मीहरूसँग कुराकानी गर्दै उहाँले यथासक्य छिटो संविधान बनाउन छोडेर संविधान संशोधनतर्फ लाग्नु गलत हुने बताउनुभयो ।
उहाँले भन्नुभयो, ‘जहिले पनि माइन्यूट परिवर्तन गर्नाले समयमा संविधान बन्नबाट रोक्छ ।’ संविधानमा स्पष्ट रूपमा राष्ट्रपति र उपराष्ट्रपतिको समयावधि तोकिएकोले कसैले कहीँबाट औँला उठाउने ठाउँ नरहेको उहाँले बताउनुभयो ।
ठूलो पार्टी भएकाले सरकारको नेतृत्व गर्ने पहिलो अधिकार कांग्रेसलाई भएको भन्दै कांग्रेसले सरकार नबनाए दोस्रो पार्टी एमालेले सरकारको नेतृत्व लिनुपर्ने बताउनुभयो । फरक प्रसङ्गमा महामन्त्री पाण्डेले एकीकृत नेकपा माओवादीसहितका दलहरूले निर्वाचन आयोगमा समानुपातिक नामावली नपठाउने निर्णयको कुनै तुक नभएको बताउनुभयो । उहाँले भन्नुभयो, ‘देशमा संविधान बनाउने हो भने जनमतको कदर गरेर दलहरू संवेदनशील हुनुको विकल्प छैन ।’
Discussion about this post