पर्सा । प्रहरीले राखेको अत्यधिक मूल्याङ्कनका कारण वीरगन्ज भन्सारमा रहेको करोडौँको माल सामान नष्ठ हुने अवस्थामा पुगेको छ । भन्सार छली र चोरी निकासीको अभियोगमा प्रहरीले जिल्लाको विभिन्न स्थानबाट नियन्त्रणमा लिएको मालवस्तु भन्सार बुझाउँदा अत्यधिक मूल्याङ्कन राखेका कारण लिलाम नभई कुहिने अवस्थामा पुगेको हो ।
थोक मूल्यको अधिकतम् ४० प्रतिशत मूल्याङ्कन हुनुपर्नेमा नेपाल प्रहरी र सशस्त्र प्रहरीले नियन्त्रणमा लिएका वस्तुको बिक्री मूल्य नै मूल्याङ्कनमा राखी भन्सार दाखिला गरेका कारण भन्सारबाट लिलाम हुन नसकेको वीरगन्ज भन्सार कार्यालयका प्रमुख रामहरि अर्यालले जानकारी दिनुभयो ।
प्रहरीले नियन्त्रणमा लिएको मालवस्तु भन्सार दाखिला गर्नु अगावै भन्सारसँग समन्वय गरी मूल्याङ्कन राख्नुपर्ने जिल्ला सुरक्षा समितिको बैठकमा लिखित सहमति भए पनि प्रहरीले सहमतिलाई बेवास्ता गर्दै आफूखुसी मूल्याङ्कन राखेकै कारण रु तीन करोडभन्दा बढी मूल्यबराबरको सुपारी, सुुकुमेल, बिस्कुट, रजनीगन्धालगायतका वस्तु भन्सारमा थन्किएको भन्सारले जनाएको छ ।
भन्सारले पटक–पटक लिलामका लागि सूचना आह्वान गर्दासमेत अत्यधिक मूल्याङ्कनकै कारण महँगो मूल्यमा लिलाम सकार्न कोही तयार नभएकाले मालवस्तु कुहिने अवस्थामा पुगेको विगत ४२ वर्षदेखि वीरगन्ज भन्सारमा लिलामी सकार गर्दै आएका वीरगन्ज उपमहानगरपालिका वडा नं १ छपकैया निवासी जोखु साह तेलीको भनाइ रहेको छ । भन्सारले आह्वान गरेको लिलाममा वस्तुको मूल्य खुद्रासरह नै रहेका कारण सकार गर्न नचाहेको तेलीको भनाइ छ ।
प्रहरीले मालवस्तु नियन्त्रणमा लिई भन्सारको सहकार्यमै भन्सार दाखिला गर्दै आए पनि कुनै–कुनै बेला प्राविधिक त्रुटीका कारण अत्यधिक मूल्याङ्कन भएको जिल्ला प्रहरी कार्यालय पर्साका प्रहरी उपरीक्षक धीरजप्रताप सिंहले बताउनुभयो । नियन्त्रणमा लिएका कतिपय वस्तुलाई तत्काल भन्सार दाखिला गर्नुपर्ने अवस्था रहे पनि भन्सारसँग मूल्याङ्कनबारे सहकार्य गर्न खोज्दा समयमा भन्सारले मूल्याङ्कन पठाउन नसकेका कारण अत्यधिक मूल्याङ्कन हुने गरेको उहाँको भनाइ छ ।
प्रहरीले नियन्त्रणमा लिई आवश्यक कारबाहीका लागि भन्सार बुझाएका मोटरसाइकलको उत्पादन मिति पत्ता नलागेको र मुद्दा चालु अवस्थामा रहेका कारण वर्षौंदेखि सयौँको सङ्ख्यामा मोटरसाइकल भन्सारमा थन्किएका छन् ।
प्रहरीले मोटरसाइकल भन्सार दाखिला गर्दा उत्पादन मिति नखोलिएको र भन्सारका प्राविधिक टोलीलाई समेत पत्ता लगाउन कठिनाइ भएका कारण मोटरसाइकल थन्किएको भन्सारले जनाएको छ । रासस
Discussion about this post